Pynrem ka HSPDP ba thombor ha Khanapara

Shillong, 29 Naitung:
Ka Seng HSPDP ka la pynrem jur ïa ka jing-kyntur pud bad ka jing-pynpra ka sorkar Assam ïa ki ïing ki sem ha Khana-para hynnin ka sngi.
Ha ka kyrwoh ba la phah da u Media Cell In charge jong ka party u samla Londoner M Soh-tun, la ong ba kane ka jingleh ka sorkar Assam kaba dang shu wan dang shen ha ka bor, ka pyni ïa ka jinglong ki sorkar kiba don ha katei ka jylla, la ka long ka sorkar ba ïalam ka Congress ne ka sorkar ba ïalam ka BJP ruh ki long kumjuh bad kata ban thombor beit ïa ki jylla kiba rit.
“Ka HSPDP ka pynrem jur ïa kane ka jingleh ka Assam kaba lah ban wanrah ka jingïakynad hapdeng ki jylla kane ka thaiñ shatei lammihngi”, la ong ka kyrwoh.
Ka Seng ka pynpaw ka jinglyngngoh ba kumno ka seng BJP kaba ïalam ïa ka sorkar ha Assam bad kaba ïalam ïa kata ka North East Democratic Alliance (NEDA) kaba la thaw na ka bynta ka jingïatreilang ban wanrah ïa ka roi ka par ha kane ka thaiñ, mynta pat ka la sdang pyni pynban daki kam thombor.
“Kaei kata ka jingïatreilang kaba ki ong, hato kadei da kaba shu thom da ka bor”, la ong ka Seng.
Ha kajuh ka por ka Seng ka kyntu ïa ka sorkar jylla ba kan shim ïa ki lad ki lynti kiba tyngeh ban ïaleh pyrshah ïa kane ka jingthombor ka Assam. Kumjuh ruh ka Seng ka kyntu ïa ka sorkar ban shim ki lad ki lynti ban pynbeit noh kloi ïa u pud u sam ka jylla.