Pynrem ka FKJGP, ia ka jing shah khot hajir u Elton Cliff Warjri ha ki pulit

Shillong: Ka Nongmynsong Police Out Post ka la khot hajir ne ‘summon’ ia u Bah Elton Cliff Warjri u ba dei ruh u Assistance General Secretary jong ka seng FKJGP Central Body halor ka jing don bynta jong u ha ka jing pynshai paidbah pyrshah ia ka Citizenship Amendment Act 2019 (CAA) bad ia ka jing donkam Inner Line Permit (ILP) ha ka jylla Meghalaya.

Halor kane, ka FKJGP ka la maham ia ka sorkar Meghalaya ba kam dei ban pynklang ia ka ding lyngba kum kine ki jingleh kiba lah ban ialam sha kaei kaei ka bym sngewtynnad. Ka seng ka pynpaw ruh ba ha kum kane ka por ka sorkar Meghalaya kala dei ban kham pynleit jingmut bha ban bud dien ia bun ki mat ka jylla khamtam ha ka ba dei bad ka jing dawa ILP bad ban pyrshah jur ia ka CAA 2019 ym da ka khot hajir ia ki nong ialam seng.

Ka seng ka kyntu ia ka sorkar Meghalaya ba kam dei ban sdang da ka ba pyntieng ne khot hajir iaki Nongialam jong ki sengbhalang lyngba kita ki ‘summon notice’ namar kan pynbitar shuh shuh ia ki dkhot jong ka seng bad lada ka sorkar kam bthah mardor ia ka tnat pulit ban sangeh ka pyntieng pynsmiej ka sorkar hi kan hap shim ia ka jing kitkhlieh lada ki mih kino kino ki jingjia ki bym sngew tynnad.