Shillong: Na ka liang ka Confederation of Meghalaya Social Organisation (CoMSO), ka pynrem jur halor ka jing kren jong u MP ka Jylla u Ma Vicent H Pala, ba ka Jylla Meghalaya kan hap jied tang ia kawei, ka ILP bad ka 6 schedule bad ruh ia ka jingong ba lada treikam ka ILP ka 6 schedule kan duh noh.
Na ka liang u Chairman ka COMSO u bah Robertjune Kharjahrin, u la ong ba kane ka dei ka jing ialam bakla ia ki paidbah ka Jylla bad ka dei ka jingkren klumar une u MP. U la ong ruh ba ka kamram jong u kum u MP, ka long ban iasaid na bynta ka Jylla khamtam eh ba un iada ia ka snap kyrpang jong ki Jaidbynriew Hynniewtrep, phewse ma u pat u kren bad u leh da kum wei pat. Lada u Ma Vincent Pala u pyrshah ia ka ILP u dei ban shu kren beit ba u pyrshah ILP, um dei ban kren kyllain.
U la ong ruh ba ka 6 schedule jong ka constitution ka India ka dei ka stieh kaba iada ia ka riti dustur, ka khyndew ka shyiap, ka khaii pateng, ki dorbar trai Ri bad ia hok kyrpang jong ngi ki trai muluk. Ki District council ki wanrah ruh ia ka roi ka par. “Ngi donkam ia ka 6 schedule bad ia ki District council bad ha ka jingshisha ngi don kam ban nang pynkhlain shuh shuh ia ka. Ka dei ka kamram jong une u MP ban trei shitom ban pynthikna ba ka 6 schedule kan nang khlain shuh shuh” ong u nongialam ka CoMSO.
Ka ILP kaba mih na ka Bengal Eastern frontier regulation 1873 ka long ka Ain ka ban pyrkhing ia ka jingrung bad shong shnong ki poiwir ha ka Jylla ba treikam ka ILP. Ka jingthmu jong ka ILP ka long ban iada ia ki trai muluk ritpaid na ka jingshah tyllep noh ha ki poiwir heh paid ha la ka jong ka Jylla. Ka ILP ka long kum ka waitlam ka ban mait da ka ain ia ki poiwir ki ba rung beain da ka jingthmu ban tyllep noh ia ngi ki trai muluk ha la ka Jylla.
“Haba phai sha ka Jylla Meghalaya bad ia ka jinglong jingman jong ka, ngi sngewdei ban ong ba ngi donkam lang ia ki District Council bad kumjuh ruh ia ka ILP lane ngi lah ban ong ba ngi donkam ia ka Stieh bad ka waitlam iada Ri. Ym dei ban ong ba ngi hap jied kawei”ong shuh katei ka kyrwoh.
“Ngi pynkynmaw ia u Bah Vincent Pala ioh u klet, ba ha Mizoram don 3 tylli ki District council , ka ILP ruh ka treikam bad nalor kata kadon ruh ka Article 371 (g) , ha Nagaland don ka article 371 (a) bad ka ILP, ha Arunachal Pradesh Don ka 371 (h) bad ka ILP bad ha Manipur ka article 371 (c) ka treikam bad nalor kata mynta sa ka ILP. Ngim lah ban ong ba lada treikam ka ILP ki district council kin duh noh namar kumba long lang kiwei ki Jylla ngi ruh ngi dei ban ioh lang kumjuh ha kaba ki don lang ka ILP bad ka sixth schedule ne bad ka article 371” ong u nongialam katei ka seng.
Hoid kadei bad ha ka jingshisha ha nga nga sngew ban ong ba kamdei b ngin hap jied bad lada u ong kumta ngi hap long kiba husiar bad nga ai mynsiem ia phi ki nong ia lam ba shakhmat ba ieng skhem ban ym kynran dien
Nga lah sngew sih haba nga ioh sngew ia ka jingong u Ma Vincent .H Pala MP ba ngin duh noh ia ka Sixth Scheduled .., mynta nga lah sngew kmen biang haba nga ioh pule ia Kane ka jing Ong U Robertjune Kharjahrin
Nga kyrshan ia ka jingong u President ka COMSO.
U ne u MP u nang tang ban kren haki khubor tang haka Ain zero. Ha jingshisha Ma U ban pynkhlain iaka Riti dustur
Lada u ma Pala u sngewthuh tang katne te, la biang eh ba un Phai dien Sha ka IOA and AA jong ki syiem Khasi bad ka Indian Dominion ne wat naduh ki Atchison Treaty bad ki nong Synshar dohlieh khnang ba un kham peiphang khyndiat ia ka lyngkor lajong bad un tip ruh iano u leit mih khmat.