Shillong: Ka kynhun jong ki sengbhalang hapoh ka lama ka Confederation of Hynniewtrep Social Organisation (CoHSO) ka la pynrem jur ia ka jingkren jong u Myntri Rangbah ka ka Tripura u Biplab Kumar Deb ba ka Citizenship Amendment Bill 2016 kam don jingktah ia ka jaidbynriew.
Haba pynlait khubor halor kane, u chairman ka CoHSO u bah Robert June Kharjahrin u la ong ba kane ka jingkren jong u Myntri Rangbah ka Tripura, ka long ka jingialam bakla bad ka jingthok jingshukor.
“Lada kane ka Citizenship Amendment Bill kan long ain, da ki klur ki khar Bangladesh kin ioh long nong India bad ngi kum ka jaidbynriew ngin sa shah tyllep noh bad duh bor noh ha la ka Ri”, la ong ka CoHSO.
U la ong ba ka jingthmu jong ka BJP ka long ban pynlong ia ka Bri Hynniewtrep ka ing shong ki Hindu na Bangladesh ban skhem ka vote jong ki kumba jia ha Tripura. “Ha ka BJP dang lah ki Hindu na Bangladesh ban ia ki trai muluk ha Ri khasi”, la ong u chairman ka CoHSO.
U la ong ba ka kynhun ka suba ba imat, ka BJP ka thmu ban pyntreikam ia ka Buit Tripura ha baroh ka thain mihngi ka India. Ka Buit Tripura ka dei ka buit poh ban pynshong da ki Bangladeshi ha India kumba ki la leh ia ka Tripura. Kumba long ha Tripura ki trai Ri ki la long ki rit pait bad ki bar Ri ki heh paid, ka BJP ka thmu ba kum kane ka jinglong ha Tripura kan jia ha baroh kawei ka thain mihngi ka India .
“Ka kynhun ka pynrem jur ia kane ka jingkren lap lah jong u Myntri Rangbah ka Tripura bad ka BJP bad ngi kyntu ia ki paidbah ban kyntait war ia kine ki jing ialam bakla”, la ong u chairman ka CoHSO.
Ha kawei ka liang, ka HYC ruh ka pynrem jur ia ki jingkren jong u Myntri Rangbah ka Tripura ba ka Citizenship Amendment Bill 2016 kam don jingktah ia ka jaidbynriew.