Shillong, 04 K’lyngkot:
Ka BJP Meghalaya ka la pynrem jur ia u myntri rangbah ka jylla u Dr Mukul Sangma uba la shu plie jubor ia ka Umtrew Hydro project ha Ri-Bhoi wat hapdeng ka jingpyrshah jur ki trai jaka namar ba ka MeECL kam pat siew ia ka bai jaka jongki.
Haba pynlait khubor mynta ka sngi, u General Secretary ka BJP u Bah Bashailang Khongwir u la ong ba ka seng ka pynrem jur ia u Mukul Sangma bad ka sorkar Congress ia ka jingleh donbor jong u ba u la plie ia ka Umtrew Hydro project khlem da siew ia ka bai jaka sha ki trai.
“Kane ka pynpaw shai ia ka jingleh donbor bad iuhroit jong u Dr. Mukul Sangma ia ka hok longtrai. Kum kane ka sorkar ka don hok ban dang synshar ha kane ka jylla?”, la ong u Bah Bashailang ha ka jingpynlait kyrwoh.