Shillong: Ka All Assam Students’ Union (AASU) ka la pynrem jur ia ka jingthom bor jong ki pulit Assam ia ki riew kynthei ha umwali, Langpih ha ka 14 tarik Rymphang 2019.
Ha ka kyrwoh ba la pynlait kyrwoh u president ka AASU u Dipanka Kumar Nath u la ong ba ka long ka bym lah ban mut dur ba ki pulit kiba la kieng atiar bha kin leit thombor ia ki kynthei bad ka dei ka jingleh riew khlaw.
Ka AASU ka la pynrem jur ia kane ka jingjia bad dawa ba dei ban pynshitom ia ki pulit.
Ka la ong ba kano kano ka jingiakajia khappud dei ban pynbeit hapdeng ki sorkar ka Meghalay bad Assam. Ka jingleh ki pulit ka la wanrah ia ka jingiapher jingmut bad ka jingkulmar.
Ka AASU ka ngeit ba ka jingiadei hapdeng u paidbah ba sah ha khappud ka lwah ban wanrah ia ka jingiasngew tynnad ka jingiasah lang khlem kano kano ka jingma.
Ka seng ka la dawa ruh ba ka jingeh khappud dei ban pynbeit noh mardor hapdeng ka sorkar Meghalaya bad ka Assam, khnang ba ki paidbah ha khappud kin nym im hapdeng ka jingma hynrei kin im ha ka jingsuk. “Ka AASU bad ka KSU kin iatreilang hapoh ka lama ka NESO ban kyntu ban pynbeit noh ia kane ka jingeh”, la ong u President ka AASU u Dipanka Kumar Nath bad u Lurinjyoti Gogoi, u General Secretary ka AASU.
Ha kajuh ka por, ka seng ki samla pule ka dong shatei lam mih ngi jong ka Ri India ka North East Students’ Organisation (NESO) ka pynrem jur ia ka jingleh riew khlaw jong ki pulit Assam da kaba bom bad tied pathar ia ki riew paidbah kyntup ia ki kynthei ha shnong Umsawli ha West Khasi Hills District.
Kane ka jingleh riewkhlaw jong ki pulit Assam kala wanrah ia ka jingmynsaw ia ki 28 ngut ki briew kyntup ia ki kynthei khynnah. Na ka liang jong ka NESO ka dawa ba dei ban pynshitom ia baroh ki briew kiba ia don kti ha kane ka kam shoh briew khamtam ki briew jong ka ain.
Haba ia dei bad ka jingdawa ban pynbeit noh ia u pud u sam ha pdeng kine jylla ka don shatei lam moh ngi, kynthup ia ka jylla Meghalaya bad ka jylla Assam ka dei ka jingdawa kaba la slem na ka liang jong ka NESO, sa shisien ka kynhun ki samla pule ka dawa ba dei ban ia pynbeit noh kloi ia u pud u sam ha pdeng kine ki ar tylli ki jylla khnang ba ki briew b aim ha khappud kin ia im suk, la ong u bah Samuel Jyrwa ha ka kyrwoh kaba la phah mynta ka sngi.
Lah ban kdew ba kumba 28 ngut ki paidbah ki la mynsaw ha ka jingshah kawut lathi ha ki pulit ka Assam ha Umwali, Langpih dang shen hadien ba la mih ka jingiashrut namar ka jingtrei ban ai bording sha ki iing baduk na ka skhim sorkar pdeng ha katei ka jaka.
Phi don ban ong eiei?