Pynrem jur ki nongrep sying ka thain Mawshynrut, ia u briew u bym pynshai shuh ia ka pisa kaba T.19 lak

Shillong: Ha ka kyrwoh kaba la phah sha ki lad pathaikhubor, ki la don shibun ngut ki nongrep Sying hapoh ka thian Mawshynrut, ki la pynrem jur ia u bah Donbok Shadap, halor ka nongrim bad ka jingkynnoh jong ki ba um shym la siew shuh ia ka pisa kaba T. 19 lak, kaba dei ka pisa jong ki nongrep Sying naduh u bnai July jong u snem ba la dep.

Lyngba ka kyrwoh, kitei ki nongrep Sying, ki la kynnoh ba ia u bah Donbok Shadap, la phah da ka I-team kaba dei na ka tnat (Agriculture), ha kaba la ong ba ki briew katei ka tnat ki la phah ha u bah Donbok Shadap, ba un leit ban lum ia ki Sying na ki nongrep ha ka thain Umdang kaba hap hapoh ka (Mawshynrut Block). Pynban kaba la pynbitar eh ia ki nongrep Sying ha katei ka thain, ka dei bad kat haduh kine ki sngi, u bah Donbok Shadap, um pat la leit siew satia ia ka pisa kaba la kot haduh T.19 lak, kaba dei ka pisa jong kitei ki nongrep Sying.

Haba iadei bad ka jingshah shet ha utei u rangbah, ia uba la phah da ka tnat ki kam rep kam riang, ki nongrep Sying na katei ka thain, ki la ioh ban pynlong jingialang lem bad ki nongialam ka Hills Farmers Union, nangta ki dkhot nongialam ka KSU bad HYC, ha kaba lyngba katei ka jingialang, ki la shim ruh ia shibun ki rai ban bad khamtam eh ban dawa na u ba u dei ban siew noh ia katei ka pisa bai Sying jong ki nongrep.

Ka rai ha katei ka jingialang, ka long ba lada um siew ia katei ka pisa, kam banse ia kito kiba la ai Sying ba kin sa leit mih sha ka iing u bah Donbok Shadap, nalorkata ba u dei ruh ban pynbiang ia ka bam ka dih katba donkam lem bad ka bai kali ia ki nongrep.

Shuh shuh, ki la rai ruh ba dei ban khang lut ia baroh ki stock mar rep jong u, nalorkata ban shim noh ia baroh ki jingdon jingem ne jaka puta jong u bah Donbok shadap, lada um lah ban siew ia ka hok jong ki nongrep.

Ha kawei pat ka liang, kitei ki nongrep bad kiba la sah pisa ha utei u rangbah, ki la kyrpad eh ia kata ka I-team jong ka tnat Agriculture bad kaba la aibor ia utei u rangbah ban leit lum ia ki Sying na ki nongrep jong katei ka thain, ba ki dei ban khot mardor ia u bad ban btah ia u ba u dei ban siewdep noh ia ka pisa kaba sah ha kitei ki nongrep Sying.