Pynrem jur ka KHNAM ia ka Good Governance Day

Shillong, 7 Naiwieng:
Ka KHNAM State Youth Wing ka pynrem jur ia ka jingthmu jong ka sorkar BJP ban rakhe ia ka National Good Governance Day ha 25 tarik u Nohprah. Ha u snem ba la leit ruh ka sorkar BJP ka la pynbna ia kane ka tarik kum ka Good Governance Day ha kaba la bthah ia ki ophis ban plie baroh shi sngi.
Kane ka la pynpaw shai kdar ia ka nongrim jong ka seng BJP da kaba iuh roit bad pyntien pynsyier ia ki niam rit paid jong ka Ri India.
Kane ka pynshai ruh ia ka jingiadei ba jan jong ka BJP bad ka kynhun shit niam ka Rashtriya Swayamsevak Sangh (RSS). Ka KHNAM ka kylli ruh “Balei ym lah ban buh good governance day ha ka sngi Holi lane sngi leh niam puja, balei ha ka sngi kristmas hi thik”.
Ka KHNAM, ka ong ba naduh ba wan ka jingsynshar jong ka BJP la iohi ia ka jingshah thombor jong ki iing mane, ki nongialam kristan na ka por sha ka por. Ka seng, ka ong ba ha ka kalender ba baroh shisnem jong u 2016 ba la pynmih da ka CBSE la iohi ba la pyntip ba ka 25 tarik u Nohprah, kan dei ka Good Governance Day, kane ka jingthmu ban buh ia ki prokram lane ban phah plie skul bad college bad ophis trei kam ha kane ka tarik ka dawa ka jingpynrem ka ba jur na baroh ki liang.
Ka seng ka pynrem jur bad ka kyrpad ia baroh ki skul ki college ki ophis ban pyrshah da kawei ka sur ia kane ka rai jong ka sorkar BJP.
Ka jingsngap jar jong ki ba bun bad ka Sorkar jylla naduh u snem ba la dep ka la ai bor ia ka BJP ban dang bteng ba uih roit.
Ka seng ka dawa ba ka sorkar jylla bad ki nongmih khmat baroh bad pynrem da kawei ka sur da kaba pynbna lymba ki lad pathai khubor ba ka jylla kan dang iai bteng ban burom ia ka jingrakhie ia ka sngi kristmas da kaba pynbna shuti kumba juh long.