Shillong: Ki dkhot ka COMSO ha ka sngi saitjain ki la leit ban jngoh ban sngewlem ia ki 14 ngut ki ba la mynsaw jur ha ka jingiaid rally ka ba la pynlong da ka COMSO ha ka 13 tarik u Nohprah ha Civil Hospital.
Na ka liang u chairman ka COMSO u bah Robertjune Kharjarin u la pynrem jur ia ki katto katne ki riewshim kabu ha kaba ki la thmu ban pynkulmar ia ka rally ka ba na ka liang ki COMSO ki thmu ban pynlong kum ka Rally kaba jaijai haduh ban da mih ka jingia pynibor na ka liang ki paidbah bad ki tnad pulit.
Na ka liang u Donboklang KharLyngdoh, u la pynrem ruh ia ka tnad pulit ba ka la pyndonkam ia ki tiar iasiat ki lyer shmat (teargas) ki rubber bullet, u la ong ba ki pulit ki lah ban pyndonkam tang da ki Fire Bridge u la ong ruh ba “Nga ngeit skhem ba ki heh pulit ruh ki khlem ai ka hukum ban siat pathar hynrei ka jingsiat jong ki ka ai ding ia u paidbah”. U la pynpaw ruh ia ka jingkhublei ia u SP city u bah Steve Rynjah u ba la ialeh ban tem ia ka jingkulmar.
Ki 14 ngut ki ba la mynsaw bad ki ba dang shah sumar ha Civil Hospital ki long u bah Khlainbor Lyngdoh (Malki)u bah Shanborlang Lyngdoh Nongbri (Laitlyngkot) u bah Lickstar Malngiang (Sohiong ) u bah Macdonal Kharkongor (Mylliem) na pdeng ki kynthei pat ki ba dang shah sumar ha Civil ki long i kong Glittering Syiemlieh bad i kong Anilar Syiemlieh ki ba dei shipara, Mebari Niang, Arilin Swer(Lawsohtum).
Kiba la kham jur ka jingmynsaw ki napdeng kine ki long u bah Khrasdiengwell Nongsiej (Mawlai kyntonmassar) u bah Bankiloler Sohshang (Riangdo) u bah Evin Warjri (Mawlai Phudmuri) u bah Baling Mawlong(Nongthliew) u bah Christopher Kharbhih (Mawlai Mawdatbaki) bad i kong Naphibansara Saibon (12 shnong).
Na ka liang ka COMSO ka la pynpaw ruh ia ka jingkhublei ia ki nongtrei jong ka Civil Hospital ha ka ba ka la ai ia ka jingshakri ka ba pura ia ki ba mynsaw ha ka sngi thohdieng.
Phi don ban ong eiei?