Pynrem ba shah ktah kti u President ki Auto

Nongpoh: Ki Nongkitkam ka Nongpoh Town Committee (NTC), ki la pynrem halor ka jingshah ktah kti u Bah Marcus Marten, President ka Nongpoh Region Auto Owner’s & Driver Association (NRAO&DA), ha ki nongialam ka HYC, kaba la jia mynha ka 27 tarik u Bnai ba la dep ha Nongpoh.

Ki nongkitkam ka NTC, ki la ong ba ka Committee kaba ju iatreilang bad baroh ki Association ha Nongpoh, kata naduh ki Sumo, ki Local Taxi, ki Tourist Taxi bad kumjuh ruh ia ki Auto Association, hynrei haba mih kum kitei ki huri hura bad ktah kti ia utei u Nongialam ki Nongniah Auto, ka pynsngewkhia eh ia ki nongkitkam ka NTC, khamtam eh ba katei ka jingiakulmar ka dei kaba jia hapdeng ka Sor Nongpoh.

Kum ki nongkitkam ka NTC, kim kwah ban mih kino kino ki hura hura ha Nongpoh, namar ki kwah ban don ka jingiaieid bad ka jingburom kaba markylliang hapdeng ki para briew.