Pynrem ba pyniap nongtrei bank

Shillong,31 Nailar:
Ka seng ki nong rep bad ki nongbylla ka Hynniewtrep Farmers and Labours Association ( HFLA) ka la pynpaw ia ka jingsngew lyng ngoh kaba khraw namar ba haduh mynta katei ka seng kam pat iohi ba kin don ki kynhun ki ban pyni lane ban pynpaw ia ka jingsngewlem lane ka jingsngew khia lane ka jingpynrem halor ka jingshah pyniap dusmon uwei u rangbah uba dei u nongtrei jong ka Meghalaya Rural Bank ha Iooksi, West Jaintia Hills.
Haba ia kren bad u Rupang u Secretary katei ka seng ki nong bylla bad ki nongrep u bah R.Synrem , u la ong ba ka Association ka tip bha ba ki don ki Union jong ki nongtrei ka Bank nongkyndong, hynrei ka la lyngngoh pat ba kitei ki Union kim saham haba shah pyniap u para nongtrei jong ki. Ka la ong ruh ba lada shah rahbor u nongtrei bank ha Garo Hills lane shah siat iap u nongtrei Petrol Pump ki la mih ki dak ia khih kiba bun jait kiba la poi ruh sha ka pakhang bank, pakhang petrol Pump hynrei haba iap u para doh para snam uba shakri bha ia ki paidbah lyngba ka jingshakri jong u ha ka bank kaba dei kyrpang tang na ka bynta ki nongkyndong ym don ba patiaw eiei, ong u bah Synrem.
Katei ka seng ki nongrep ka la pynrem jur ia ki runar kiba la pyniap dusmon ia u nongtrei jong ka bank nongkyndong ha Iooksi, ka seng ka la ong ba utei u nongtrei uba shong basah hapoh ka mala jong katei ka bank hi udei u nongtrei uba shakri hok, bad ka la ong ba lehse ka jingshah pyniap jong u ka dei na ka daw ba u iada ia ki pisa bad ki jingdon jingem katei ka bank.