Pynpra ki pulit ia ka jaka rieh ki ANVC (B), kurup bun ki tiar ialeh

Tura, 12 lyngkot:
Ki pulit jong ka Meg halaya, ki shim ba ka jingialeh pyrshah jongki bad ki dkhot jong ka ANVC ha ka sngi saitjain ba ladep, ha Darengagal hajan Chun mati Dobasipara ha ka sor bah Tura, jong ka West Garo Hills District, ka dei ka jingjop kaba don burom tam jongki, ha kaba la ioh ban siat iap ia ki 4ngut ki dkhot jong ka A’chik National Volunteers Council – B (ANVC-B), ha kaba la siat iap ia kitei ki 4ngut ha ka jingialeh pyrshah bad ki SOT – SWAT bad ba la ioh ruh shibun ki tiar ialeh, na katei ka jaka rieh jong kitei ki ehrang.
U Superintendent of Police, West Garo Hills, U Mukesh Kr. Singh, u iathuh “Ka dei ka jing khynra kaba heh tam, ha kine ki hynriew bnai ba ladep. Ngi la siat iap ia ki 4ngut ki dkhot jong katei ka seng kaikhlaw bad ngi la pynpra ruh ia ka ktem jongki. Ngi ngeit ba katei ka dei ka ktem, kaba la shong la sah da ki dkhot jong ka ANVC (B) bad ka jingtohkit, ka dang iaid shakhmat haduh mynta”.
La pynlong ia katei ka jingkhynra, ha ka sngi saitjain, haba ka la don ka jingpynbthei bom, da kitei ki ehrang, hajan ka petrol pump ha Hawakhana, ha ka por 5.40 janmiet bad ba ar tylli ki kali, ki la julor, wat la kam shym don kano kano ka jingiap briew.
U Mukesh, u iathuh ba u shim ba ka don ka jingiatrei lang hapdeng ka ANVC-B bad ka United A’chik Liberation Army (UALA), na ka bynta ban pynmih ia ki kam ialeh pyrshah, ba har rukom ha Garo Hills.
Ka jingiasiat hynnin ka sngi, ha Darengagal, kaba don 4 Kilometre na Tura, ka la neh hynnin ka sngi, haduh 45 minit, ha kaba ka jingialeh kaba jur, ka la jia ha ka por 8.15 minit mynmiet, ong U Mukesh.
Mynta ka sngi pat, ki pulit, ki la leit biang sha katei ka jaka rieh tngen, ha kaba la kem ia 15ngut ki briew, ha kaba ka jingtohkit, ka dang iaid shakhmat ban pynthikna ia ka jingiadei jongki bad ka ANVC B bad ba la pynpra ruh ia katei ka jaka rieh tngen.
Na katei ka ktem, la ioh kurup ia hynriew tylli ki pistol, kawei ka DBBL riffle, 20 tylli ki kuli kiba dang im, 200tylli ki tiar pynbthei bom, shiphew tylli ki khnam bad sa shibun kiwei de ki tiar ialeh. La ioh ruh ia ka risit kaba la ai da ka Tura Municipal Board, kaba ai wai iing ha ka kyrteng jong U Rimpu Barnand Marak.