Pynpra ka MUDA, 2 ki ing paki dulan ha Shillong

Shillong, 9 Risaw:
Ka Meghalaya Urban Development Authority (MUDA) mynta ka sngi ka la sdang ban pynpra biang ia ki ing paki dulan kiba tei palat ia ka lai mala hangne ha nongbah Shillong. Katei ka jingpynpra ka dei hadien ba ka Meghalaya High Court ka la pynmih hukum ha ka 28 tarik u nailur ba dei ban pynpra noh ia ki ing paki dula kiba palat ia ka lai mala.
Mynta ka sngi ka MUDA ka la leit ban pynpra ia ki ar tylli ki iing kawei ha Bivar Road kaba dei trai da u Raj Kumari Sinha bad kawei pat ha Jail Road kaba dei trai u Bidur Das. La sdang ia katei ka jingpynpra ha ka por 9:30 baje mynstep.
Lah ruh ban pynkynmaw ba kham mynshuwa ki la don 13 tylli ki ing kiba don ha ka thup ka MUDA kiba palat ia ka lai mala kiba la ioh bor na ka Supreme Court ban pynsangeh noh shipor ia ka jingpynpra ia ki hynrei la ong ba katei ka jingai bor ka Supreme Court kan kut noh tang ha ka 12 tarik mynta u bnai.
Ki 13 tylli ki iing kiba la ioh hukum shipor na ka Supreme Court ban pynsangeh haduh ka 12 tarik mynta u bnai ki dei ka ing jong u Satyabrata Baidya, Ajit Dasgupta, BD Marbaniang, Mentok Ri Projects Pvt Ltd, Mohendro Rapsang, Beroline Khongshei, Saini Pala, Narayan Prasad Jhunjhunwala, Nilesh Tibrewalla, Manchin Fincon Pvt Ltd, Nicholas Wallang, Sanjay Jhunjhunwala bad ka ing u Maruf Elahi.