Shillong, 11 Naiwieng:
Ka nongialam sengbha lang, ka Kong Angela Rangad ka la ther ia ka sorkar kaba la pynpra beain ia ki iing sah jong ki briew ha shnong Mawlong-Mawtari bad Umsawli ha ka 8 tarik mynta u bnai.
Haba kren mynta ka sngi, ha ki nongthoh khubor ha jaka ba pynlong ia ka jingiashong kyrain ha khmat ka SP ophis, Ka Kong Angela ka la ong ba ka jingwan khynra beain ki nongtrei ka MUDA, ki pulit bad ki private security ka long thik kumba wan kyndang ia ki mentuh ia ka iing ka sem jong ki briew.
“Ki la wan kum ki mentuh, khlem kano kano ka jingtip bad kane ka dei ka sorkar jong ki heh spah ban niom bein ia kiba duk ba rangli bapli”, la ong ka Kong Angela.
Ka la ong ba ia ki jaka ha them metor bad ha kiwei ki jaka, ka sorkar kam nud ban leh kumba leh ia ki Khasi bad kane ka pyni ba ka dei ka sorkar jong ki heh spah kaba shu nion beit ia kiba rit. Ia katei ka jaka, kaba pynpra la thied da ka tnad IT department bad ka NEEPCO.
“Ngin thoh sha kine ki tnad ba ka jingthied kam biang bad ka dei ka jingleh beain”, la ong ka Kong Angela.
“Ngi dawa ba ka sorkar ka dei ban ai biang ia ki iing ba la pynpra kaba dei ka hok jong ki paidbah”, ka bynrap ka Kong Angela.
Mynta ka sngi, ka Kong Angela lem bad kiwei ki nongialam sengbhalang ki longkmie, ki la ialam ia ki trai iing kiba shah pynpra ban iakynduh ia u Deputy Commissioner ka East Khasi Hills ban pan jingshai balei ki la wan ban leh kumtei ia ki iing sah jong ki briew khlem ka jingtip.
Hynrei ha ka jingiakynduh kaba la neh katto katne, u DC u la niat ba kam dei kaba leh ma u, hynrei dei kaba leh da ka tnad MUDA.
Ka la ong ba katei ka kam, ka dei kaba slem bad kam pat don kano kano ka rai kaba shai halor kane ka bynta, bad ka jingleh ka dei ka jingthom bor ia ka hok jong ki paidbah.
Ki trai iing bad ka kong Angela ki la dawa ba dei ban ai jingshai ia katei ka jingjia ba la wan khynra ia ki iing bad ka jingktah ia ki riew kynthei bad mano ba ai hukum ban leh ia katei. La dawa ruh ban dei ban pynlait noh mardor ia ka Kong Agnes Kharshiing kaba shah kem khlem kano kano ka jingbuh kyndon.
Ki trai iing ba shah pynpra ha ka MUDA ha kine ki sngi na shnong Mawlong-Mawtari bad Umsawli, ki la pynlong ia ka jingshong kyllain myngngor mynta ka sngi, hakhmat ophis SP. Hapoh ka jingialam ka Kong Agela Rangad, ki la pynlong ia ka jingshong kyrain kum ka jingpynpaw ia ka jingpyrshah ia ka jingwan kyndang naphang ka sorkar ia ki ing jongki.
Hynriew tylli ki iing sah briew ha Mawlong-Mawtari bad ar tylli ka sem masi ki la shah pynpra ha ka MUDA ba la wan ialam da ki pulit bad private security ban pynpra ia ki iing ki sem ha ka 8 tarik Naiwieng 2013.
Ka Kong Angela Rangad ka la ong ba ki briew ba shah pynpra ki la buh ia 9 tylli ki mat jingdawa na u DC, kynthup ban ai ia ka jingpynbna ne ka hukum ba iadei bad ka jingkyndang ia ki iing briew ha katei ka sngi, ai ka hukum ba la pynmih ban leh ia katei ka kam kyndang ha ka sngi shuti bad kaei ka daw ba pynlong ban khynra ha ka shuti, ai ia ka hukum balei la pyndonkam ia ki private security agency bad ki pulit, ban ai ia ka jinglong jong ka FIR ba la ujor halor kaba iadei ka jingbym biang ban shim ia katei ka jaka bad ka jingbym biang ki kot ki sla ba la buh ha u Jylliew 2012, ka ain ka dei ban long ryntih ia baroh hynrei kam trei kam haba ujor ia kiwei ki tnad kum ha kam thung nonghikai skul LP, ICDS bad kiwei, katkum ka riti synshar ka ri ka Article 21, ki briew ki don ka hok ban don ka iing bad ka jaka riehtngen bad wat ka hukum ka Supreme Court kam lah ban pynjulor ia ka iing sah briew.
Ki la dawa ruh ba dei ban pynlong ia ka jingtohkit halor ka jingnud ban ktah kti ia ki kynthei ha ka por ba ki wan khynra.
Ki la dawa ba dei ban sangeh noh mardor ia ka jingknieh jaka sha kitei ki thain bad dawa ba dei ban pynshai hynne ka sngi.
Hynrei haduh 4 pm ba la ap, u DC um shym la ai kano kano ka jubab. Ki la byrngem ba kin pynlong ia ka jingiakhih kaba kham jur lada kim ioh ia ka jubab na u DC.
Katkum ka jingiathuh jong ki trai iing kiba la shah pynpra ia ki iing ki sem jong ki haduh mynta ki la shu sah sakma ha kano kano ka jaka.
Phi don ban ong eiei?