Kolkata, 16 Jylliew:
U MP ka Trinamool Congress uba dei ruh u actor ka phlim Bollywood u Mithun Chakraborty mynta ka sngi hat majai u la pynphai ia ka T.1.2 klur tyngka sha ka Enforcement Directorate ( ED) kaba dei ka pisa ba u ioh na ka Saradha Group ha ka por ba u la long u nongai khubor, katei ka kynhun kaba la shah kynnoh bamsap bad kaba dang don hapdeng ka jingtohkit.
Ki lad khubor ki la iathuh bas hi kynhun ki nongiasaid ain bad kiwei pat kiba mih khmat ia u Mithun ki la leit sha ka ophis kaba tohkit ia katei ka jingkynnoh bamsap kaba don ha Salt Lake bad ki la aiti ia ka Demand Draft ( DD) sha ki ophisar kiba tohkit ia katei ka case. “Kane ka dei ka sienjam kaba u Mithun u la shim wut wut da kaba pynphai noh ia ka pisa ba u la ioh na katei ka Group, ia ka DD la aiti sha u ophisar ba tohkit ia ka bamsap Saradha” ong ki tyllong khubor.
La iathuh ba katei ka kynhun tohkit ka la sngewhun ia katei ka jingleh u Mithun bad ki jingkren jong u ha kaba iadei bad ki kam kiba u leh kum u nongkit ‘tien syiem katei ka Group. Ka ED ka la tohkit khadduh ia u Mithun ha u jymmang, 2015 ha kaba u Mithun u la pyni bad ai sha ka kynhun tohkit ia ki DVD, ki CD bad ki jingthoh ba u la ioh kum u nongai khubor jong ka Saradha Group. La ong ba katei ka jingleh u Mithun ka long ban pynksan ia ka jingkam jong u ha ki nongtohkit ba ka jingdon bynta jong u bad katei ka Group ka long beit thik ha ka jingtreikam ym ba u don jingmut ban thok ban shukor iano iano. “U la iathuh ha ki nong tohkit ba um don jingiadei eiei bad kino kino ki kam bamsap kiba don hapoh katei ka Group, bad u la pyni ruh ia baroh ki rikod shimet ba ki rikod ba u ia treikam bad katei ka Group sha ki nong tohkit” ong ka tyllong khubor. U la kular ruh kham mynshuwa ba un pynphai ia katei ka T.1.2 klur tyngka kaba u la ioh na ka Saradha Group khnang ba kan leit biang sha ki nong thep pisa kiba la kynnoh ba ki shah thok ha katei ka Group.
Phi don ban ong eiei?