Pynphai U Lat, ia ka Bill phiah constituency MDC

Shillong, 26 Nailur:
U Lat ka Jylla, u KK Paul hadien ba u la bishar bniah ia ka bill phiah constituency jong ka Khasi Hills Autonomous District Council (KHADC) um shym la mynjur bad kyntait ban soi ia kane ka bill, hynrei u la pynphai kylla noh ryngkat ka jingai jingmut ban thaw da ka Delimitation Komishon na ka bynta baroh 3 tylli ki District council ha ka jylla, kata ka KHADC, JHADD bad GHADC.
“U Lat ka Jylla u la pynphai noh ia kane ka bill phiah constituency jong ka KHADC hadien ba u la dep bishar bniah. U Lat u la ai jingmut ia ka sorkar ban thaw da ka Delimitation Komishon”, la ong uwei na ki heh sorkar jong ka tnad District Council Affair jong ka sorkar Jylla, u bym kwah ban pynpaw kyrteng.
Na ka liang jong ka tnad ba dei khmih ia ki District Council, ka District Council Affair jong ka sorkar Jylla, ka la phah ia kane ka Bill jong ka KHADC sha u Lat ka Jylla mynta u bnai na ka bynta ban ioh ia ka jingmynjur jongu, hynrei na ka liang jong u Lat pat u la pynphai kylla ha kine ki khyndiat sngi ba la dep.
Haba iakren bad u bah HDR Lyngdoh Myntri ba dei khmih ia ki District Council u la iathuh ba haduh mynta ym pat lah ban ong ei ei halor kane, namar ka sorkar Jylla ka dang pynbit pynbiang ia ki jingdonkam. “Shen ngan sa iathuh kham bniah halor kane ka bill”, u la bynrap.
Lah ban pynkynmaw hangne ba ki MDC kiba don hapoh ka liang synshar ha KHADC, dangshen hapoh ka jingialam jong u Bah Pynshngain N Syiem ki la leit iakynduh ia u Myntri Rangbah ka Jylla, u Dr. Mukul Sangma ha kaba ki la ban jur ba ka sorkar ka dei ban ai jingmynjur bad phah noh sha u Lat ka Jylla khnang ba yn lah ban pynlong ia ka ilekshon da ki constituency ba la dep phiah thymmai.