Pynphai ka tnad MHA ia ka VAB ka KHADC, na ki kyndon bym iahap

Shillong, 11 Rymphang:
Ka sorkar jylla ka la ioh pdiang ia ka Village Administration Bill (VAB) ka KHADC kaba la pynphai da ka tnad kam pohiing ka ri (ministry Home Affairs), ryngkat ki kyndon ne ki bynta ki bym iahap bad, ki dei ban pynbeit ia ki.
Ia kane, la iathuh da u Myntri Rangbah ka jylla u Mukul Sangma haba iakren ha kane ka sngi Balang.
“Ngi la ioh ia ka shithi na ka tnad kam pohiing  ka ri lyngba u Lat ka jylla ia ka VAB, kaba la pynphai ryngkat ki point kiba don jingduna. Ia ka VAB, la phah biang sha ka tnad District Council Affairs (DCA) ka sorkar jylla ban bishar bha ia ki”, la ong u Mukul.
U la ong ba ka jingshah kyntait ka VAB ka KHADC ban ioh ia ka jingmynjur ka dei namar ba ka KHADC kam shym la kohnguh ia ki jingai jingmut ka sorkar kaba khot jingialang halor kane ha ki bnai ba la dep.
“Lada ka KHADC ka leh kumba leh ka JHADC, ka VAB la dep ban mynjur da u Lat”, la ong u Mukul.
Ha kawei ka liang, na ka liang u Secretary ka Synjuk Ki Rangbah Shnong Ka Bri U Hynniewtrep (SNSBH), u Bah RL Blah u la ong ba, ka sorkar ka la kular ba kan khot ia ka jingialang jong ka district council ban don  lang ki heh sorkar jylla bad na ka synjuk ban iakren ia kine ki jingthoh ba la ioh na ka tnad MHA.
“Ngi la iakren ruh ba ka sorkar jylla ka dei ban thep da ka jingujor pyrshah ia ka rai ka High Court  ka Meghalaya kaba hukum ban pynneh ia ka jingtreikam ka ain shna iing ka MUDA”, la ong u Bah Blah hadien ba la mih jyndat na ka jingiakren hynnin ka sngi ba la khot u Myntri Rangbah.