Nongpoh: Shi taiew hadien ba u MLA Jirang, u la dep ban pynkup burom ia ki 50 ngut ki samla na ka thain Jirang, kiba la wan ha ka kyrdan First Division ha ka Secondary School Leaving Certificate (SSLC), hynnin ka sngi pat, la pynkup burom bad sam khusnam pat sa ia ki 150 ngut ki samla ha ka thain Byrnihat, ia kaba la pynlong ha ha CTI Auditorium Hall, Umpher.
Ha katei ka sngi kaba la pynlong ia katei ka jingpynkup burom, la sakhi da ka jingdon u Bah Wailadmiki Shylla, MLA ka Jowai kum u Kongsan, ha ryngkat ka jingdon u Bah Sosthenes Sohtun, MLA ka Jirang, nangta u Bah Victor Rani MDC Jirang, ki nonghikai lem bad shibun kiwei ki riew rangbah.
Haba khein kyllum ia baroh ki nongioh khusnam, ki la don haduh 200 tam ki samla kiba la wan ha ka kyrdan nyngkong bad haba sam khusnam ia kitei ki 200 ngut, u MLA Jirang, u la ai da ka pisa kaba T. 2 hajar uwei, nangta ka memento bad ki jain, kaba long kum shi bynta ban pynshlur bad ai mynsiem ia kitei ki samla kiba la wan shakhmat ha ka SSLC.
Haba kren kum u kongsan ha katei ka sngi, u Bah Wailadmiki Shylla, u la ai jingiaroh eh ia u Bah Sosthenes Sohtun, MLA Jirang, namar ba u la shimkhia ban pynkup burom ïa kito ki khynnah kiba la wan shakhmat ha ka SSLC.
Ha ki jingkren jong u, u la pynpaw ruh ba na ka liang jong u, nangne shakhmat un bud noh ia ka nuksa jong u MLA Jirang bad kata ka long ban sam khusnam noh ia kito ki samla kiba hap ha Jowai Constituency, kiba la wan shakhmat ha ka SSLC.
Phi don ban ong eiei?