Pynngat mukotduma ka sorkar ia ki nongialam FKJGP, GSU, ADE

Shillong, 10 Lber:
Ka sorkar ka la pynngat mukotduma ia ki nongialam ka GSU, FKJGP bad ADE halor ka jingialap paidbah jongki ban nym treh ban iashim bynta ha ka elekshon MDC sha ka GHADC ban pyrshah ia ka jingailad ia ki bar jylla ban thep vote ha ka elekshon ba dang shu shen.
Ia kane la ong ka myntri kam pohiing ka jylla ka Kong Roshan Warjri haba jubab ia ka jingkylli ba la wanrah da u MLA shimet u John Leslee K Sangma hynne ka sngi hapoh ka iing dorbar thaw ain.
“La rejister mukotduma ia ki nongialam ka GSU, FKJGP bad ADE bad ka dei ka sou moto case ba la leh da ki pulit”, la ong ka kong Roshan.
Ka Kong Roshan ka la ong ba ka jingtohkit ka dang iaid haduh kine ki sngi ia kane ka kam bad ka sorkar kan sa leh ia kaba donkam hadien ba la dep ia ka jingtohkit. “Ngin sa peit hadien ba la dep ia ka jingtohkit”, la ong ka Kong Roshan bad bynrap ba ka jingialap jong kine ki seng ban nym treh ban iashim ha ka elekshon, kam shym la ktah namar ba ki don 79.49percent bad 68.11 percent. “Ki don tang lai tylli ki jaka thep vote kiba thylli”, ka la ong.
Shwa ia kane, haba wanrah ia ka jingkylli,  u Leslee u la ong ba ha katei ka sngi ba long elekshon, ka jingktah ka la long pynban tang ha ki jaka ba sah ki Garo, katba ha ki jaka ba sah ki bym dei Garo, ka iaid beit, watla ka jingpyrshah ka long ia ka jingioh thep vote ki bar jylla ha GHADC.
Lah ban kdew ba ki sengbhalang, ki la pynlong ia ka jingbym treh ban iashim bynta ha ka elekshon MDC sha ka GHADC ban pyrshah ia ka jingailad ia ki bar jylla ban iashim bynta ha kane ka elekshon. Ki la dawa ba dei ban ailad tang ia ki Garo ban iashim bynta ha ka elekshon sha ka GHADC kumba leh ia ka KHADC bad JHADC ha kaba kiba iashim bynta ki dei tang ki Khasi bad Jaintia.