Pynngat kyndon ka ophis u DEO ia ki kyrtong ba pynkhein ia ki kyndon MCC

Nongpoh: Ka ophis u District Election Officer ka Ri Bhoi District, la pyntip paidbah, ba ki la don ki katto katne ki kyrtong kiba la pynkhien ia ki kyndon ka Model Code of Conduct (MCC) ha kaba ki la pynlong ia ki katto katne ki jingialang khlem da ioh jingbit na ki Returning Officer.

Ka kyrwoh na ka ophis u DEO Ri Bhoi, la ong ba ia kitei ki kyrtong kiba la leh pyrshah ia ki kyndon ka MCC, ki la shah pynngat katkum ki kyndon ka Representation of people act, namar katei ka jingpynlong jingialang jong ki khlem jingbit, ka dei kaba long beain.

Kumta na ka liang u DEO ka Ri Bhoi, u la kyntu ia ki paidbah, ba lada ki lap ia kino kino kiba pynlong jingialang khlem da ioh jingbit ne kiba pynkhein ia ki kyndon ka MCC, ba ki lah ban pyntip lyngba ka Civil app/1950, khang ba ka ophis u DEO ba kan ioh ban leh ia kaba donkam.