Pynngat ka sorkar ia ki nongialam CoMSO, na ka jingjia ha khyrdop U Lat

Shillong: Ki nongialam sengbhalang CoMSO mynta ka sngi kila shah khot hajir ha ki pulit ha Sardar Police Station halor ka jingialam ban pynlong ia ka jingiakhih pyrshah ha ka 13 tarik Nohprah 2019 hakhmat ka khyrdop iing u Lat ka jylla, ia ka jingpynlong ain ka sorkar pdeng ia ka Citizenship Amendment Act (CAA) 2019.

Hadien ba la shah kylli napoh police station, u vice president ka HYC u bah Donboklang Khar lyngdoh bad u bah Lamphrang Kharbani u president ka HANM, kila kren sha ki lad pathai khubor, ha kaba kila iathuh ba kila shah kylli ha ki pulit ha kiba bun ki jingkylli ba ki la pynlong ia ka jingiakhih pyrshah ia ka CAA.
Ki la iathuh ba ki pulit kila kylli ia ki shaphang kumno ki ioh jingbit ban iaid rally, mano ba kyrshan ba bei pisa,mano ba don kti ia ki jingthang kali sorkar, ka jingiakawang maw,ka jingshah shoh ki bar jylla, mano ba sdang nyngkong ia ka jingpynkulmar ha khmat Iing U Lat.
U bah Donboklang u la ong ba wat hapdeng ka jingshah pyntieng hynrei ym nym pyndem namar ba haba shakri ia ka jaitbynriew, shiliang ka kjat ka don ha u paidbah bad shiliang ka dei ban don ha phatok.
“La pynngat kyndon ia nga haduh palat 50 tylli eiei ha ki kyndon bapher bapher ha ki 6 tylli ki mukotduma”, u la ong.
U la bynrap, “Kum u shakri ka jaitbynriew, nga la long uba khreh ban phong sopti koidi ban shong ha phatok na ka bynta ka ri bad ka jaitbynriew”.
U la ong ba u la ngat teng ha ka iing byndi bad dang shen ha kane ka jingialang paidbah, u la lait salit na u kuli na shyrkait.Kine ki kyndon kim lei lei bad pynngat shuh sa kiwei ki kyndon namar ba um don eiei ban tieng na ka bynta ka ri bad ka jaitbynriew.
U la iathuh ba mynta u la shah khot hajir ha Sardar Police Station hynrei lashai ruh u la shah khot hajir ha Mawlai Police Station. U la ong ba na ka liang ka CoMSO kam eiei ban pyrshah ia kane ka sorkar ba ialam u Conrad K Sangma namar ba ka la jubab bad shimkhia ia ka jingdawa jong ki paidbah.
Katba u bah Lamphrang Kharbani u la ong ba kum kane ka jingleh ka long kumba ai mynsiem na ka bynta ban iakhun ia ka jaitbynriew. U la ong ba ka jingwan jong ki dkhot ha kane ka sngi ban sakhi ia kane ka jingshah khot, ka dei ka jingai mynsiem ban iakhun ia ka jaitbynriew.