Pynneh ia ka Residential School ha Lawbyrtun:HYC

Shillong, 6 Rymphang:
Ka Hynniewtrep Youth Council (HYC) Mawthadraishan Circle ka la leit iakynduh ia u Director of School Education & Literacy u A Ch Marak ban dawa ban pynneh ia ka Residential School ha shnong Lawbyrtun.
U President ka HYC Mawthadraishan Circle u Bah Marcos R Myrthong haba ai jingkren sha ki lad pathai khubor mynta ka sngi ula ong ba ka jing iakynduh ka HYC bad u Director of School Education & Literacy u A Ch Marak ka long ban kyrpad na ka bynta ban pynneh ia ka Skul kaba don Law byrtun kaba hap hapoh ka Mawthadraishan C&RD Block West Khasi Hills District namar ia katei ka skul ka la thmu ban rah noh sha kawei ka jaka.
U Samla Marcos ula ong ba katkum ka jingioh jingtip jong ka seng ha ka 4 tarik Nailar 2014 ia ka tender na ka ophis u Chief Engineer PWD (Building) ban tei ia ka skul Lawbyrtun la don ka jingkhang hynrei la thmu ban rah sha kawei pat ka jaka.
Ki paidbah ka Shnong Lawbyrtun ki thrang ba ia katei ka skul ka dei ban don beit ha katei ka shnong namar ba ka long donkam ia ki paid nongshnong da kan don ka skul ha katei ka jaka.
Ha ka jingleit ia kynduh ka seng mynta ka sngi bad u Director of School Education& Literacy ka la long kaba seisoh namar ka sorkar ka la rai ban pynneh beit ia ka skul Lawbyrtun.
Ka seng ka ai khublei ia ka sorkar,u Director of School Education & Literacy u A Ch Marak bad u Prof RC Laloo u Minister ka tnad pule puthi ban sngap bad pynurlong ia ka jingangnud ki paidbah ba katei ka skul dei ban don ha Lawbyrtun.