Ban nang kham pynkhlain shuh shuh ka jingtreikam ba radbah jong ka na ka bynta ka ban pynurlong ka thong jong ka India ban long kiba lah ban shaniah ha lade ha kaba iadei bad ka bording ne ka Energy Independence kat ha ka snem 2047 bad ka Net Zero ha ka snem 2070, ka Toyota Kirloskar Motor (TKM) mynta ka sngi ka la buh dak ia ka jingiashim bynta ha ka India Energy Week 2025, kaba la long ha Delhi naduh ka 11 haduh 14 tarik u Rymphang 2025.
Ka India Energy Week 2025 (IEW) ka dei kawei na ki rynsan ba kongsan bha ban pyni paidbah shaphang ki lad ki lynti ban kyntiew ia ka jingpynmih bor treikam kaba khuid ba suba ban sngewthuh shaphang ia ka jinglah ban shaniah ha lade ha ka kam pynmih bor treikam bad ban pynduna ia ka jingpynmih ia ka carbon. Kane ka lympung ka la wanrah lang ia ka jingiashim bynta jong ki nongialam sain pyrthei na kylleng ki ri, ki nongshna ain, ki nongialam kiba khraw pyrkhat, ki riewshemphang bad ki nongpyndonkam bor treikam ban iatai ha kaba iadei bad ka bor treikam, ki kor ki bor, ki rukom treikam jong ki karkhana bad ka jingthaw ia ki kyndon treikam.
Da kaba phai khmat sha ka phang kaba iadei bad ka jingshna ia ki kali kiban long kiba iaineh ia kaba la pyniaid da ki bor treikam kiba khuid, ka TKM ka la pyni ia bun tylli ki lad ki lynti kiba long ka bor ban pyndonkam na ka bynta ki kali ha ki rukom bapher bapher kaba pyni ia ka jingdonkam jong ka por ban wanrah ia ka jingkylla kaba sted bad ban nang pyniar shuh shuh ia kane ka kam.
Don bun jait ki lad ki lynti ha kaba lah ban pyndonkam da ka bor treikam kaba khuid ba suba kaba kynthup ia ka jingpyndonkam da ka elektrik bad kiwei pat ki jait umphniang kiba lah ban iarap ia ka kam kali ban duna ka jingshaniah ha ka umphniang ba tih na khyndew kaban pynduna shibun eh ia ka jingpynmih ia ka carbon. Haba peit ia ka rukom pyndonkam bor treikam ha India kaba iakhleh, ka jingdon jong ki nongpyndonkam kiba ha la ki jong ki jingdonkam, ka jingbiang ki jingtei, bad ka jingangnud ka sorkar kata ka ‘Atma Nirbhar’, ka TKM ka pyrshang ban wanrah ia ki kor ki bor ba bun jait kiban iahap na ka bynta ka ri da kaba buh ha khmat ia ka thong jong ka ‘Make in India’.
Phi don ban ong eiei?