Pynmih hukum u Lat ban thung ia ki dkhot ka Komishon Khaw Tad dor

Shillong, 20 Nailur:
Ka sorkar jylla ka la wanrah ia ka jing pynbna ba la thaw ia ki rule jong ka Meghalaya State Food Commission Rules (MSFCR) 2014 kaba iadei ban thung ia ki dkhot bad chairman jong ka komishon ban ioh khaw tad dor katkum ka ain jong ka National Food Security Act 2013.
Katkum ka jingpyn bna u Lat ka jylla, ha kane ka komishon, yn don uwei u chairperson, bad san ngut ki dkhot ha kaba uwei na kine, un dei u member secretary bym duna ia ka kyrdan kum u Joint Secretary ka sorkar jylla.
Ka por jong u chairperson bad ki dkhot kan long lai snem.
Ka kamram jong kane ka komishon ka long ban peit bad ban pynshong dor ia ka jingpyntreikam ia kane ka ain ai marbam ha ka dor tad bad ban pynshitom ia kiba pyn khein ia kane ka ain.
La kdew ha kane ka rule, ba kane ka komishon ka  lah ban shim ia kano kano ka jingtip na kino kino lada don ka jingpynkhein ia kane ka ain bad khamtam haba ioh ia ka jingthoh jingujor.
Kawei pat ka kamram ka long ban ai jingmut ia ka sorkar jylla ba kan pyntreikam ia kane ka skhim sam marbam tad dor kaban long kaba jop ha ka jylla.
Ban bishar ruh ia ka jingujor na u District Grievances Redressal Officer bad ban pynkhreh ia ka repod ia ka sorkar.