Pynmih hukum ka DC, halor ka dor bai shong kali kamai ha Ri Bhoi

Nongpoh: Ka District Magistrate Ri-Bhoi District, ka la pynmih ia ka hukum halor ka bai shong ha ki kali kiba kit ia ki nongleit nongwan ha Ri Bhoi, kiba kynthup naduh ki Local Taxi, Auto rickshaw, Sumo, ki Bus, Mini bus, SSTS, SPTS bad SSPTS.

Ka hukum kaba la pynmih da ka District Magistrate, la kdew ba ki Local Taxi ki dei ban kit briew tang 3 ngut ki nongleit nongwan bad ki dei ban shim T. 26 tyngka ha ka shi kilometre kaba sdang bad 13 tyngka ha man la ka kilometre kaba bud, ki sumo ki dei ban kit tang 7 ngut ha ka dor T. 2.05 shi kilometre uwei u ne ka briew, ki auto rickshaw ki dei ban kit tang 2 ngut ha ka dor T. 14 tyngka shi kilometre bad 6 tyngka ha manla ka kilometre kaba bud, katba ki mini bus, ki bus, SSTS, SPTS bad SSPTS ki dei ban kit mar shiteng na kaba ki ju kit bad kam dei ban palat ia ka 16 ngut ha ka dor T. 1.80 ha ka shi kilometre uwei ne kawei ka nongleit nongwan.

Kino kino kiba ki pynkhein ia katei ka hukum da kaba shim palat ka bai kali ne kit palat ia kaba la buh, kin sa ngat ha ka jingshah pynshitom kiba katkum ki kyndon Ain.