Pynlut pisa ha ki sngi kut snem

Ka kaiphod jong U Deputy Account General (DAG) jong ka sorkar India, ka kren sngewkhia bha halor ka jing pynlut pisa maphot jong ka sorkar Meghalaya, ha ki khyndiat sngi, shwa jong ka sngi kut snem bad ha katei ka jingkhein, la pyni ba tang ha ki lai sngi ba khadduh jong U Lber 2018, ka jing pynlut pisa ka poi sha ka T.896klur, katba ha ka shibnai jong U Lber jong katei kajuh ka snem, ka jing pynlut pisa ka poi sha ka T.1,535klur bad ha ki kyntien jong U DAG, ka pyni ba katei ka jingleh, ka dei ka jing bym iaid beit ka rukom pyniaid ia ka pisa lane kaba la thoh weak fiscal manage ment on the part of the government.
Ka jingkren jong U DAG, ka kdew shai namarkata ba ka rukom pyniaid ia ka pisa sorkar, ha ka por jong ka sorkar Congress 2017-18, ka long ka bym beit satia bad haba kren ia katei ka mat, kam mut ba ngin dang iai tuklar ia kaba la dep, hynrei ngi iohi, ba ka donkam ban iakren ia katei ka mat, ha kine ki sngi bad ha kane ka sorkar kaba mynta ruh, namar ba ngi iohi, ba kane ka sorkar NPP, UDP ruh, ka dang iaid da kajuh ka lynti hi bad kata ka long ba lait noh na ki MLA, MDC, ki nongtrei sorkar, hynrei kiba bun bah ki ioh jingsiew ha ka shisien lai bnai bad ha kiba bun ki khep, la iohi, ba ka don ka jing sei sngewlem ia ki ram ki shah jong ki nonghikai, ki kontraktor, ki kotkhubor ha ki sngi kut jong U Lber ba man la u snem.
Kane ka jingleh, ka kdew shai namarkata ba kiba don hok ban ioh bam shngiam ia ka dud ia ka ngam, ia ka dohmet, ia ka dohkshong, ki dei tang ki MLA, MDC bad ki nongtrei sorkar, katba kiwei pat ki dei ban bam da ka dohtam, doh kyntait bad ka doh pyut ka dohpyar suda, kaba la bret bad ka bym donkam shuh da kitei kiba don ha katei ka kyrdan.
Lyngba ka jing kynthah jong katei ka tnat kaba peit pyrman, ia ka lut ka sep, ha ki tnat sorkar, ka la dei namarkata ka por, ba dei ban pynkylla ia kane ka rukom pyrkhat, namar ba ka pyni, ba ki don ki kynrad bad nangta ki don sa ki mraw, lane kaba thew ba ia kaba bam khlieh khiew, ka dei ban leit sha kitei haneng bad ia ka ja ingkhong lane kaba tam, yn sa ia sam sha kiwei pat kiba don jing iadei ha ki kam sorkar bad katei ka dei ka kam pohjait pohrati. [rms]