Nongpoh, 14 Rymphang:
Kum kawei na ki kynhun ki samla, ka Young Mind Association na Ri Bhoi, myn ha ka 13 tarik u Rymphang ka la pynlong ia ka “Valentine’s Strawberry Festival” ha Orchid Umiam, Ri Bhoi District, shibynta ban kynmaw ia ka sngi kyrpang jong ki shijur bad ruh kum ka jingai mynsiem ia kito kiba rep ia u soh Strawbery.
Ia kane ka Tamasa la plie pyrda hapdeng ka jingiphuh iphieng, ha kaba u Dr.Celestine Lyngdoh, Parliament Secretary ka sorkar jylla, u la long kum u kongsan, ha ryngkat ka jingdonlang jong u President ka Strawberry Growers Ri Bhoi District, Bah Osmander Lyngkhoi, ki riewrangbah lem bad bun ngut ki nongrep soh Strawberry jong ka thain Ri Bhoi.
Haba kren kum u kongsan, u Dr. Celestine Lyngdoh, ha kaba nyngkong eh u la ai ka jingkhublei ia u samla Richard Lyngdoh, president ka Young Mind lem bad ia ki dkhot, kiba la ialeh shitom ban pynlong ia kane ka Tamasa, namar ka jingthmu jong kane ka Tamasa ka long ban ai mynsiem kyntiew ia ka kam rep soh Strawberry, khamtam eh ha thain Ri Bhoi, kaba dei kawei na ki jaka kaba iahap bha ban rep ia u soh Strawberry.
“U Strawberry u dei u jait soh uba lah ban pyndonkam ha kiba bun ki liang bad ha kajuh ka por u dei ruh u soh uba thnem bha ka dor, namar ia u Strawberry la pyndonkam ban shna Ice Cream, ki jingpynsma iwbih bad kumta ter ter” ong u Dr. Celestine Lyngdoh.
Kumta na ka liang jong u, u la kyntu ia ki nongrep Strawberry ba kin nangiaibteng ha kaban rep ia une u jait soh, namar lada ki lah ban pynmih shibun ia u Strawberry kam pynmyntoi tang ia kiba rep, hynrei wat ia ka jylla ruh kumjuh, namar lyngba jong une u soh kan ruh khring ia ki nongwan jngohkai pyrthei, bynrap u Dr. Celistine Lyngdoh.
Ha kane ka sngi la ioh ruh ia ka jingkren na u Bah Osmander Lyngkhoi, ha kaba u la pyni ia ki nongrim halor ka jingbymlah ban kyntiew ban pynroi ia une u Strawbery, ka daw kaba kongsan eh halor ka jingbymlah ban kyntiew ia u Strawberry ha ka Jylla, kadei namar ba ym lah ban pynmih symbai, kumta la hap ban shanniah tylli ia ki symbai ba na jngai katta naduh California, USA.
Shuh shuh, kumba ka long mynta ka jylla ka donkam 1 haduh 2 ton ha ka shisngi, hynrei sngewsih, namar kumba la dawa ym lah ban pynmih, ka long ka jingduhnong ym tang ia ki paid nongrep Strawberry, hynrei wat ia ka sorkar ruh kumjuh, tang namar ka jingbymlah ban pynmih na la ka jong ka jylla, la hap ban shanniah noh na ka jingshalan ban a shabar, bynrap u Bah Osmander Lyngkhoi.
Ban pynkut pat ia kane ka tamasa, ka Young Mind ka la pynbud ruh da ka tem ka pud lyngba ki nongrwai ba pawnam bad kumjuh ruh da ka DJ Imran na Mumbai, kum shi bynta ban lehkmen shuwa shi sngi ban rakhe ia ka Valentine’s Day.
Phi don ban ong eiei?