Shillong: Ka Franciscan Youth Federation Northeast India (Fyfnei), Khanduli Unit ryngkat ka jing iatreilang (in collaboration) bad ka Nehru Yuva Kendra, Jowai, ka pynlong ia ka seminar kaba shi sngi (one-day seminar) halor ka phang “shongkha kloi” (early marriage), ha ka 16tarik Nohprah, 2018 ha Lum Assisi Secondary School Umshangiar (Khanduli), West Jaintia Hills District, Meghalaya.
Ha ka jingkren pdiang burom U samla Tynshain Krem uba dei ruh I President jong ka Fyfnei Khanduli Unit, u pynpaw ka jing sngew nguh kaba khraw ia ka Nehru Yuva Kendra, Jowai ba ka lah iarap ia ki samla lyngba ki nongkren (resource person) kumno ban sngewthuh shaphang ka jingim samla khamtam kumno ban long kita ki samla ba pura (mature) ha ka kam shongkha shongman.
Uwei na ki nongkren (resource person) U Br. Collinsius Wanniang, ha ka jingkren jong u, u pynpaw ka jing sngew khia ka ba jur khamtam eh ha ba phai sha ka Ri Khasi-Pnar jong ngi ba bun na ki samla ki shongkha ha ka rta kaba dang rit. U ong ka daw ka long ba ki samla ha ka Ri jong ngi ki long ki bym kitkhlieh iala ka jong ka jingim bad ka wei ka long ka jingduk (poverty) kaba pynbor ia ki samla khamtam eh ki kynthei ba kin shim tnga khlem pat da dei por, ha ka jingpyrkhat jong ki ban lait na kita ki jingeh. Haba phai pat sha ka jingkren jong U Br. Herman Wanniang (resource person) u kyntiew ia ki samla ba ki dei ban long ki samla kiba husiar, namar ka bor bad ka burom jong u briew ka shong tang ha u hi marwei, ym don ba lah ban pynkylla, hynrei ka jingtrei shitom bad ka jing iaishah kan jop ha ka ba kut. Halor katei ka phang (subject) u pynshai da kren ruh shaphang ka Prohibition of Child Marriage Act 2006, u ban jur da kaba ong ba ka Supreme Court kan pynshitom ia kito ki khynnah kiba shongkha ha ka rta kaba dang rit ki bym pat kot sha ka 18 snem na ka bynta ki kynthei bad 21 snem na ka bynta ki shynrang.