Pynlong prokram kyrpang ka Don Bosco Higher Secondary School, Umswai, West Karbi Anglong District, Assam

Shillong: Ka Don Bosco Higher Secondary School, Umswai, West Karbi Anglong District, Assam ka la pynlong ïa ka prokram ba kyrpang na ka bynta ki khynnah klass XI and XII jong katei ka skul ha ka 6 bad 7 tarik Naitung 2022. U nongai jinghikai ha katei ka prokram ba kyrpang ha kitei ki ar sngi, u dei u Convenor jong ka All India Education Forum jong ka jylla Meghalaya, u Bah Bisharlang Pyngrope.

Shibun ki mat u nongai jinghikai, ula ai bad ktah ha kitei ki ar sngi. Ha baroh ar sngi, u Bah Bisharlang Pyngrope u la kren, batai bad pynshai ïa ki khynnah jong katei ka skul shaphang ka jingdonkam ban don ïa ka thong (goal setting), ka jingmlien ban pule kot (study habit), kumno ban pyndonkam hok ïa ka por (time management) bad ki khynnah skul jong ka spah snem ba arphew wei (students of the 21st century).

U Bah Bisharlang, u la batai shai ïa ki khynnah shaphang ka jingdonkam ban don ïa ka thong. Ka thong ba ki don ka dei ban long kaba thikna, kaba lah ban thew, kaba lah ban long, kaba trei kam bad kaba don ka por kaba biang ban poi sha ka thong. Kum ki khynnah ki dei ban don ka jingmlien ban pule ïa ki kot ki dei ruh ban sngewthuh ïa ki bor bad ki jingkhlaiñ ba ki don, ki jingtlot bad jingduna ba ki don, ki lad ba ki ioh bad ki jingeh ba ki hap ban ïa kynduh kum ki khynnah skul. Shuh shuh u nongai jinghikai u la batai shai ïa ki khynnah shaphang ka jingdonkam jong ka por, ka jingdonkam ban bud ryntih ïa ka por khreh kot bad kiwei kiwei pat kiba donkam kumno ban pyndonkam hok ïa ka por. Shuh shuh u la ban shaphang kita ki buit ba ki khynnah jong ka spah snem ba arphew wei ki dei ban don kum ki buit ban pyrkhat jylliew bad ban wad ki lad ban weng ïa ki jingeh ba ki ïa kynduh, ki buit ban shim bynta ne ai bynta ia kiwei, ki buit ban ïa trei lang kum ka kynhun bad ki buit ban thaw thymmai ne leh thymmai ha kino ki kam ba ki dei ban leh. U Principal jong katei ka skul u Phadar Nicodim Aind SDB, u la ai ka jingïaroh ïa u nongai jinghikai ba u la lah ban pynsngew bad pynkhih win ïa ka jingmut jong ki khynnah skul shaphang kaei kaba ki donkam kum ki khynnah skul jong ka juk kaba mynta. Shuh shuh u la kyntu bad kynpham ïa ki khynnah skul ba ki dei ban bud bad ban pyntreikam ïa ki jinghikai ba ki la ioh ha baroh ar sngi khnang ba kin lah ban kham shemphang bad sngewthuh nangne shakhmat kaei ba ki dei ban leh ban kumno ba ki dei ban leh kum ki khynnah skul. Nalor kine, u Bah Bisharlang u la ai ruh ïa ki kam ban leh ha ki kynhun kynhun bad kumjuh ruh marwei marwei ïa ki khynnah skul khnang ba kin lah ban sngewthuh shuh shuh shaphang ka jinghikai bad jingbatai.