Pynlong prokram ka MLCU ha Shnong Kongthong ban hikai shang pyrthei

Shillong: Da ka jingthmu ban pyniasoh ia ka jingpule bad ka jingmad dalade (experience) bad kumjuh ban plie ka lad ia ki khynnah pule ban ioh ia ka jingtip da kaba mad hi marmet , ka Department of Tourism and Travel Managment jong ka skulbah Martin Luther Christian University, ka la pynlong ia ka Community Camp ha ka shnong Kongthong naduh ka 24 tarik haduh ka 26 tarik u bnai Iaiong 2019. Ka shnong Kongthong ka jngai kumba 60 kilometar na sorbah Shillong. Kawei ka jinglong jong ka shnong kaba khring bha ia ki nongjngoh kai pyrthei ka dei ka rukom tynrai kaba bud ha kane ka shnong ha kaba ki briew ha kane ka shnong kim ju pyndonkam da ki kyrteng haba ki khot iwei ia iwei, pynban ki shu ia siaw lane pynpah da ki sur haba ki khot briew. Man iwei pa iwei i briew ha Kongthong i don la ka jong ka jong ka sur kaba la ai ha ka por ba kha bad la pyndonkam beit da kata ka sur haba khot ia ita i briew. Namar ba kane ka shnong ka don ha ranab lum, ju iohsngew ia ki jingkynud sur ba bang shikaddei eh haba ki briew ki khot iwei ia iwei.

Kane ka jingleit jong ki khynnah sha kane ka shnong ka la iarap ia ki ban iohi bad sngewthuh ia ka tnat jngoh kai pyrthei kaba la pyniaid hi da ka shnong (community based). Ia ka kam jngoh kai pyrthei ha kane ka shnong la pyniaid da ka Indigenous Agro Tourism Cooperative Society ryngkat bad ka shnong hapoh ka jingpeit jong uwei na ki nongshong shnong, U Bah Rothel Khongsit. Kum shibynta jong kane ka Camp la pynlong ruh ia ki cultural prokram ha kiba la iashim bynta da ki khynnah pule bad ki nongshong shnong. Kine ki prokram ki la khring ruh ia ki nongshong shnong jong ki shnong kiba marjan kum na Mawlang, Mawsohmat bad na Khrang. Ki nongshong shnong ki la ong ba kane ka dei ka sien ba nyngkong eh ia ki ban ioh kum kane ka jaid prokram bad ba ka long ruh ka prokram ba heh tam ban long ha ka shnong jong ki.
Ki khynnah pule ki la ioh ban batai ia ki nongshong shnong shaphang ki Customer Service Skills bad ki Sustainable Tourism Practices. Ryngkat bad kine la pynlong ruh ia ki jingiakynduh bad jingiamir jingmut bad ki nongshong shnong halor ki homestay kiba iarap ban pyniar ia ka kam jngoh kai pyrthei bad kiba long ruh ha kajuh ka por ki lad kamai jakpoh.