Shillong: Ka All India Education Forum kaba dei ka kynhun jong ki nonghikai kiba hikai ha ki skul bad ki jaka pule bapher bapher kiba don ha baroh kawei ka ri India ka la pynlong ïa ka prokram ba kyrpang na ka bynta ki nonghikai jong ka Tluh Secondary School, Tluh, East Jaiñtia Hills District ha ka 6 ka 7 tarik u Kyllalyngkot 20211. U nongai jinghikai ha katei ka prokram ba kyrpang ha kitei ki ar sngi, u dei u convener jong ka jylla Meghalaya, u Bah Bisharlang Pyngrope.
Shibun ki mat u nongai jinghikai u la ai bad ktah ha kitei ki ar sngi. Ha ka sngi kaba nyngkong u Bah Bisharlang Pyngrope u la kren bad batai shaphang ka kam nonghikai, ki jinglong ba kyrpang ba ki nonghikai ki dei ban don, ki kamram ba ki nonghikai ki don bad ki dei ban leh ha ka spah snem kaba arphew wei.
Kiwei pat ki mat jinghikai kum u/ka nonghikai ka nuksa ïa kiwei, ki rukom ai jinghikai kiba biang bha ïa ki khynnah skul, kiwei pat ki rukom kumno ban synshar ia ki khynnah skul bad ki lad jingïada ban pyndonkam ha ka pule puthi la ioh ban pynshai bad pynsngewthuh. Nalor kine, u Bah Bisharlang u la ai ruh ïa ki kam ban leh ha ki kynhun kynhun ïa ki nonghikai khnang ba kin lah ban sngewthuh shuh shuh shaphang ki khynnah bad ka kam kaba ki la shimti.
Ha man la ki kynta jong ka jingïashong lang, u nongai jinghikai u la kren bad batai shai shaphang ka kamram ba ki nonghikai ki don bad ka jingdon jong ïa ka bor ba lah ban pynlong ne pynmih ïa ka jingkylla ha ka imlang sahlang. Shuh shuh u la kyntu ïa ki nonghikai u ba ki dei barabor ban kynmaw ba ki dei ki nonghikai jong ka spah snem ba ar phew wei. U la pynshlur ïa ki nonghikai ban ïaid shaphrang ha ki kam jong ki wat lada ki shem bun ki jingeh bad ki diengpynkiang. U la pynkynmaw ïa ki ba ka kam nonghikai ka dei ka kam ba donburom, ka dei ka jingkhot ba kyrpang bad ka dei ruh ka kam ha kaba ki la ioh ka bor ba kyrpang na U Blei ban pyndep bad ban pynurlong ia ka saiñdur jong U.
Phi don ban ong eiei?