Pynlong ka Umladkhur ia ka shad Sukra kaba nyngkong

Jowai, 8 Jymmang:
Ka Shnong Umladkhur ha ka sien kaba nyngkong eh ka la pynlong ia ka Shad Sukra na ka bynta ban lehkmen leh sngewbha ha shwa ban hiar rep hiar riang sha ki hali ki pynthor.
Ia kane ka Shad Sukra la pynlong da ka Seng Kyntu Sein Raij Umladkhur (SKSRU) ha ka ki khun samla, ki rangbah ki longkmie jong ka shnong ki la ia shim bynta shongshit. Shuh Shuh ki marjan shnong ruh bad kiwei kiwei pat ki kynhun ba la shah khot sngewbha ki la wan ban ia shim bynta ha ki jingshad tynrai bapher bapher ha la ki riam tynrai.
U Local MLA ka thain, u ma Stephanson Mukhim u la long u kongsan bad haba kren kum u kongsan u la kitbok kitrwiang ia ki nongshong shnong bad u la kyrkhu kyrdoh ia ki paid nongrem ban bha ka rep ka riang ha une u snem.
Ka Shad Sukra kadei ka shad tynrai ki Pnar bad ha ka shnong Umladkhur ruh la ju pynlong ia kum kane ka tamasa hynrei la sangeh noh. Hynrei mynta ka snem ka SKSRU ka la pynkhie im biang ia kane ka shad Sukra.
Kawei pat ka khubor, ka iathuh ba ka Shad Sukra ha ka shnong Mukhaialong kan long ha ka 11 bad 12 tarik une u bnai. Na ka liang ka Dorbar Shnong Mukhaïalaong ka khot bad wer ïa baroh ki para shong parathaw ki paralok para jor kiba na jan bad na jnai ba kin wan sakhi lang sha kane ka ka tamasa Shad Sukra. Ha katei ka Shad Sukra ha ka 11 tarik ha ka por 8:00 pm kan don ka jingïashad bad ka rwai (solo), katba ha ka 12 tatik ha ka por 1 baje nohphai sngi yn pyndep ïa ka shad sukra mih lum bad ha ka por 8 baje mynmiet pat yn don ka Drama bad kiwei de.