Pynlong ka NSC, ka jingialang noh synniang khunswet

Nongstoin, 07 Rymphang:
Ka Nongkasen Sport Club mynha ka sngi saitjain jong ka taiew ba la lah ka la pynlong ia ka jingialang na ka bynta ban ai mynsiem bad noh synniang ia ki khun swet kiba dang leit skul kiba don ha katei ka shnong khnang ba kin nang iai bteng bad minot ia ka jingpule ka jong ki.
Ka jingthmu jong ka NSC ban pynlong ia katei ka prokram noh jingiarap sha ki khunswet  kiba dang leit skul ka long ban ai mynsiem ha kajuh ka por kum ka jingpynpaw ia ka jingiadon kti lang bad ki khamtam ba kin nang lah ban iaid shaphrang ha ki jingpule.
Ia katei kajingialang la pynlong ha Dorbar Hall jong ka shnong Nongkasen, ha kaba la ia don lang ruh ki ba haiing ba ha sem ki jong kitei ki khun swet, u bah M.H.Thabah u wei  na ki riew rangbah ka shnong Nongkasen u ba la long ruh kum u kongsan, ka kong K.P.Sun Head teacher Govt.LP School Nongkasen, ka kong B.Warjri Head teacher Nongkseh LP.School, u bah M.D.Lyngdoh, Tbn. Balang Presbyterian Nong kasen, u bah Sharling Marngar General secretary ka NSC, bad ki wei ki wei.
Ha katei ka sngi kumba ar phew ar ngut ki khunswet, ki la ioh ia kajingiarap da ka pisa lyngba ka jingnoh synniang jong u bah M.H.Thabah, u ba dei u wei na ki rangbah u ba don ia ka mynsiem kaba kylliud na ka bynta kitei ki khun swet, ha kaba baroh ka pisa bala noh synniang sha kitei ki khun swet u la pynlut bad sei hi nala ka jong ka pla, bad kala long ruh ka jingkyrkhu kaba khraw ia ki khunswet khamtam ba kin ioh ban pyndon kam ia katei ka pisa ha ka jingpule ka jong ki.
U kongsan haba ai jingkren ha katei ka jingialang u la ai khublei kyrpang ia ka NSC kaba shim ia ka jingiatrei lang bad u na ka bynta ban pynlong ia katei ka prokram ai jingiarap sha ki khunswet, bad u la ong ruh ba kine ki jingai ki long kiba rit eh hynrei watla ki long kiba rit nga kyrmen ba kin long kiba myntoi ong u bah Thabah.
Shuh shuh u la ong ruh ba broh ka jingnoh synniang jong u sha kitei ki khun swet kam shym la don kano kano kajingiarap kaba wan na ki wei hynrei Ka dei ka hok bad ka umsyep ka jong u kaba u la iai kynshew kaba u la don ka jingthrang ban iadon bynta lang bad ki khunswet, u kongsan u la ai ruh ia ka jingkitbok kitrwiang ia baroh ki khunswet bad ha kajuh kapor u la kyntu ruh ia ki ba kim dei ban sngew khunswet, hynrei nang iai trei shitom ban nang kiew shaphrang ha ka jingpule.