Pynlong ka KSU ia ka jingjurip ia ka skul JNV Nongstoin

Nongstoin, 22 Nailur:
Na ka bynta ban wad jingtip ha kaba iadei bad ka rukom pyniaid bad kumjuh ia ka khuid ka suba hapoh jong ka skul Jawaharlal Navodaya Vidalia Nongstoin, ka seng Khasi Student Union Nongstoin Circle hapoh ka jingialam jong u samla Davis goldfield Wanñiang hynnin ka sngi kala leit ban pynlong ia ka jingjurip kaba kynsan ia katei ka skul.
Ha katei ka jingleit jurip jong ka seng ia katei ka skul la lap ruh ba ki ba bun ki jaka ha sawdong sawkun hapoh pud u sam jong katei ka skul ki long kiba jakhlia khamtam ha ki jaka bam ki khynnah, ka jaka bret nuit bad wat ka jaka shet jingshet ruh.
Shuh shuh hadien ba ka seng kala dep ban pynlong ia ka jingjurip kala leit ruh ban iakynduh ia u Principal jong katei ka skul bad ha katei ka jingiakynduh na ka liang jong ka seng ka la kyntu ia u tei u principal ba un hikai bha ia ki nongtrei ba kin long kiba lehkhuid.
Na ka liang jong ka seng kala kyntu ruh ia u tei u principal ba u dei ban wah noh ia ka jingthoh kyrteng (NamePlate) ha khmat ka kamra treikam ka jong u bad dei ruh ban thoh da ki dak ki bal ah ban ithuh lang da baroh namar kumba ka long mynta ia katei ka jingtah kyrteng ka la paw tynkrein da ka ktien Hindi ha kaba kiba bun na ki paitbah jong ka thain kim lah ban pule wat lada ki lah ban pule ruh kim sngewthuh pat.
Ym tang kata ka seng ka la kyntu ruh ia u Principal katei ka skul ba un nymdei shuh ban phah hikai ia ka subject English sha ka ktien Hindi namar ki khynnah kiba bun kim lah ban sngewthuh, bad don ruh kiba la wan ban ujor ha ki dkhot jong ka seng haba iadei bad katei ka phang.
Hadien katei na ka liang jong u Principal katei ka skul haba iakren bad ki nongthoh khubor u la ong ba halor kitei kiei kiei baroh na ka liang jong u ha ryngkat bad ka skul hi baroh kawei un sa pyrshang katba lah ei bad ban trei shitom ban pynwandur bha ia ka jinglong jingman jong katei ka skul khamtam haba iadei bad ka jingkhuid jingsuba.