Pynlong jingialang ki TMC ha Maikhuli, ban kyrshan ia ki MLA ka seng, kiba don ha Delhi

Nongpoh:Shi bynta ban kyrshan ia ki jingiakhih kaba la shim da ki MP bad MLA ka All India Trinamool Congress, kiba la pynlong ia ka jingiakhih ha phyllaw ka Parliament ha Nongbah Delhi, na ka bynta ban dawa halor ki mat jingdonkam hapoh ka jylla Meghalaya, hynnin ka sngi, ki nongialam ka TMC ka jylla ha ryngkat ki paidbah ka thain Pillangkata, ki la pynlong ia ka jingiakhih ha madan ka shnong Maikhuli.

Ha katei ka jingialang paidbah ha Maikhuli, la sakhi da ka jingdon u Bah James Lyngdoh, Vice President ka TMC ha ka jylla, nangta ka Dr. Saralin Dorphang, President ka TMC na Mawhati, u Sunmoon Marak lem bad shibun kiwei ki nongialam bad ki nongkyrshan ka TMC ha Jirang Constituency.

U Bah James Lyngdoh, haba kren sha ki lad pathai khubor, u la ong ba ka nongrim kaba la pynlong ia ka TMC ha ka jylla ban kan iashimbynta ia katei ka jingiakhih, ar-tylli ki jaka, kata kawei ha Maikhuli bad kawei pat la pynlong ha Malangkona, ka long ba kyrshan ia ka jingiakhih ha Nongbah Delhi, kiba la leit ban pynlong ia ka jingiakhih, na ka bynta ka jingmyntoi ki paidbah ha ka jylli hi baroh kawei.

Haba sngap ia ka jingkren jong ki riew paidbah bad ki nongïalam ka TMC, ka long ba ki la dawa ïa ka sorkar jylla ba ki dei ban pynduh pyndam noh ia katei ka MoU ne ka soskular, namar ba ka la ktah eh ia ka Meghalaya bad bun ki jaka ka Meghalaya ba kin sa shah kynthup noh sha Assam.