Shillong: Ka jingialang Kur Killing Timung Meghalaya-Assam ka la long hynnin ka sngi Saitjain ha ka shnong Narlong ba hapoh ka Jirang C&RD Block, Ri Bhoi District.
Ia kane ka jingialang kur la pynlong man u snem na bynta ban ialum lang ia ki kur Killing Timung kumba 30 eiei ki jaid kiba dei na kajuh ka kpoh ban ithuh ithaw ban lait na ka jingiashong kha shongman shikur khamtam ha kane juk ki kor ki bor saian bad tehknoloji bad internet ka lah ban ialam bakla ha ka shongkha namar ka jingbym tip.
Shwa ban sdang ka jingialang la pynher ia ka lama ka seng kur Killing Timung da u President ka seng kur Killing Timung Karbi Anglong u Sem killing bad la ioh ka jingkren pynshai halor ka jingmut jong ka lama kaba dei ka rong sky blue kaba kdew ia ka jingkhuid.
U kongsan u long u Longri Phangcho (retired IAS) bad u dkhot ka Northeastern council, ula ong ka jingialang kur ka thymmei ban tehsong ia ka kur ka jaid bad ban kyntiew ia ka roi kum ka kynhun ha ka imlang sahlang hapoh ka kur bad ban iasnoh ktilang ha ki jingeh ha ka pang ka shitom.
Kaba sngew phylla ha kane jingialang kur Killing Timung ki la pynlong ia ka jingduwai na bynta ki mynsiem na la khlad ba kin ioh ka jingjah thait. Ia ka jingduwai la pynlong ha ki ar jaka kawei na bynta kiba long khristan bad kawei ki bym pat khristan kata kiba dang bat dangksoh ia niam tynrai haduh mynta.
Kiwei pat ki rangbah ba ai jingkren ki long President seng kur Killing Timung Karbi Anglong u Sem Killing, President ka seng kur Killing Timung Meghalaya u bah Arbinus Timung, U hemanto killing Timung, u Genl.Secretary ka All Meghalaya Karbi Association bad kiwei kiwei.
La pynphuh pynphieng ia kane jingialang kur da ki jingrwai bad shad ki khun samla ka kur Killing Amring, Rongmeshek bad kiwei kiwei. Ia ka jingialang la pyniaid da u Alfone Killing.
Phi don ban ong eiei?