|
Shillong: Mynta ka sngi ka KSU Laskein Circle ka la pynlong ia ka jingiaiaid Paidbah naduh na Priang shaduh sha Iawpyngkat Iooksi, ha kaba da ki hajar ngut ki paidbah ki la mih ryntih ban ia iaid kjat lang.
 Kane ka jingiaid paidbah ka long kum shi bynta ban pynrem ia ka jingshah batbor bad shah pyniap i heprit ba dang 5 snem, ha ka 17 tarik u Kyllalyngkot haka Shnong Priang WJH.
Hakane ka jingiaiaid paidbah la ia donlang U Samla Ohibait Dkhar President Ka KSU JHDU, U Samla Danny Shadap, Vice President Ka FKJGP West Jaintia Hills, Ki nongialam shnong Ka Thain Iooksi, Ki Seng Longkmie, ki riew paidbah bad kiwei kiwei.
 Hadien ka jingiaiaid paidbah ka la don ka jingialang paidbah ha Iawpyngkat Iooksi, ha kaba ia ka jingialang la pyniaid da u Samla Nangaibormi Sutnga , u nongaibuit ka KSU Iooksi Unit.
Haba ai jingiakren haka jingialang, u Samla Balawan Suchiang President u la ong ba kum ka Seng ka la dap da ka jingsngewkhia iakane ka jingjia kaba ktah mationg ia ka jaitbynriew ka jong ngi. “Kum kane ka jingjia ka dei ka jingjia kaba ka imlang sahlang kam lah ban pdiang da leilei ruh” la ong u samla Balawan, ” Ngin sa phah da ka jingthoh (joint signature) sha ka sorkar ha kaba yn iasoi lang ki Rangbah Shnong ka thain ha ryngkat ka KSU ban dawa naka Sorkar ban shimrai tyngeh pyrshah ia utei u runar bym don jingsngew shuh wat ia i heprit ba dang 5 snem la rta ruh” ula ong shuh shuh.
Katba na ka liang u samla Danny Shadap u nongialam ka FKJGP pat ula ong ba u Dawanbiang Langstang, u dei u runar uba la iap ka jingiatiplem, bad ngi hi ngim Kwah ba yn Dawanbiang kum kine ki jingjia kiba khyllah ha ka thain bad ka jaitbynriew ka jong ngi.
Naka liang u samla Ohibait Dkhar u nongialam ka KSU napoh Jaintia Hills pat ula ong ba ki jingthombor ia ki khynnah rit hapoh ka jylla ka jong ngi ka la nangkiew na kawei ka por sha ka wei pat, kumta ka dei ka kamram jong ka sorkar bad ruh jong ngi iwei pa iwei ki nongshong shnong ban ia snohkti lang hakum kane ka khep ban pynduh jait iakum kine ki kam pohjait pohrati.
|