|
Shillong: Ka Hynñiewtrep Youths’ Council Sohïong Circle, ka la pynlong ka jingiaid paidbah ha ka 21tarik Rymphang 2019), ha ka shnong Dira ba la khot da ki synjuk ki Rangbah Shnong ban pynrem jur ïa u nong batbor bad pynïap dusumon ïa kawei ka hep rit bad ka seng, ka la pynrem jur ïa u Ason Jana uba la batbor bad pynïap dusumon ïa i heprit ba lui lui iba dang 12 snem.
Haba pynrem ha kane ka sngi ba la ïa mih paidbah, na ka liang jong u President Samla Purningstar Shabong ula pynpaw ïa ka jing sngewsih kthang haduh katta katta ha kaba ïadei bad ka jing shah ïuh roit ïa ka hok longbriew manbriew jong i tei i heprit kaba la jia ha ka miet sngi u Blei ha ka 10tarik Rymphang 2019 bad ong ba ka kamram jong u kñi ka long ban ïada ban ker, ban ri ban sumar bad ban sneng ban khraw ïala ki jong ki para ki pyrsha, ki kur ki jait bad ïa ka ing ka sem, hynrei une u briew ula duh noh ïa ka maiñ ka iktiar bad ka kyrdan longkñie jong u ha kaba ula leh kum kane ka kam pohjait bad ka kam ki mynsiem riewkhlaw. Ula ong ruh, na ka liang jong ka Seng HYC Sohïong Circle ka dawa na ki bor jong ka aiñ ba kin bishar hok katkum ka aiñ, ban sdien phasi ne ban set phatok shi jingim ïa u Ason Jana namar ba i heprit iba la shah batbor bad shah pynïap dusumon i dei iba dang 12 snem, ban phah tohkit ruh ïa ka ing jong u Ason ïohba lehse ka don ka jing ïa sylla ban pynïap ïa i namar kat kum ka jing ïathuh i kmie jong i heprit, ha ka sngi ba ka seng ka leit ïa kynduh ïa i ba i heprit Merilin i don ha ing jong u Ason baroh shi sngi ha kato ka sngi ba jia ka tei ka jing jia.
Ha kajuh ka por, u samla Purningstar ula kyrpad ruh ïa ki bor shnong bad ruh ïa ki bor jong ka aiñ(Police Department) ba kan ai ka jing ïada kaba kyrpang ïa ka ing ka sem jong kiba la shah ban beiñ ïoh ba lehse kin don kino kino kiba byrngem byrsit bad kput kylla ha kaba ïadei bad ka jing phah kem ïa u nongleh kam bymman.
Ha kaba khatduh, u Samla Purningstar ula pynpaw ba ka Seng HYC Sohïong Circle ka ai ka jing kyrkhu kyrdoh bad ka kitbok kitrwiang ïa ka ing i mei ipa, ki hynmen ki para bad ka ing ka sem i heprit ( L) Merilin ba kin ïa khoit ïa khiah krat khiah stang, ba kin ïa bit ïa biang ha ka kamai kajih, ka rep ka riang, ka pule puthi bad ha baroh ki kam ba bha ha ka jingim kaba manla ka sngi ha ryngkat ka sneng ka khraw, ha ka burom ka akor ba synlar.
|
Phi don ban ong eiei?