Pynlong jingduwai ki riewniam China bad U bah Lapang

Shillong, 31 Risaw:
Ka kynhun Chinese Christian Prayer Fellowship, ba la ialam da U Pastor Ye Xingwang, na ka balang Hongguioo, ha kaba la synran ruh da ka Wan Acai, ka nongialam jong ka Women Prayer Group, nangta U Chen Shun, Secretary, ha ryngkat bad U Phadar Baby Thomas, ki la ia kynduh ia U bah DD Lapang, President MPCC bad u nongai jingmut ba rangbah jong ka sorkar Meghalaya mynta ka sngi.
Katei ka kynhun, ka dang shu wan na Israel bad mynta ki don ha Meghalaya bad kin leit sha Bangladesh bad sha kiwei de ki Ri jong ka pyrthei. Ka jingiaid lynti jongki, ka long ban wan rah ia ka jingsuk, ka jingia tylli bad ban pynbna ba U Jisu Krist, u dei u nongpynim jong ka pyrthei.
Katei ka kynhun, ka iathuh ba ha China, ki don 10 percent ki Kristan lane kiba don 100million ngut bad ki iathuh ba ka balang, kaba don ha Hongguioo, ka la don 75snem ka rta bad ki iathuh ba ki don bun bah ki iingmane kiba heh ha China. U Bah DD Lapang lem bad katei ka kynhun, ki la don ka jing ia duwai lang bad ula kit bok ba kin leit suk ha ka jingiaid lynti jongki bad ba kin duwai ruh na bynta ka Meghalaya bad ka India.