|
Shillong: Ka Sohra Coaching Centre ka centre ba la seng da ki riew trei mon sngewbha ban tei ia ki khynnah skul ka thain Sohra, kaba kynthup ia katto katne ki nonghikai University,college, nonghikai skul bad nongtrei kam shimet ka shnong Sohra,ki la pynlong ia ka jingiakob shut jabieng bad career Counselling ia ki khynnah skul secondary jong ka thain Sohra ha ka 3 tarik u Naiwieng 2018 ha St.John Bosco Boys’ HSS,Sohra.Na bun ki skul ba la khot sngewbha,6 tylli ki skul ki la wan shim bynta.
 La sdang ia ka jingiakob, ha ka por 10 baje mynstep ba la pdiang sngewbha da ka Convener ka Centre, ka Kong Lucia M.Synrem.Ki jingkylli na ka bynta kane ka competition la pynkhreh da ki riew shemphang bad la kynthup ia ki jingkylli ha ka subject Maths,Science,English, GK & General Aptitude.Ka jingthmu jong kane ka competition ka long ban pynkhreh ia ki khynnah na ka bynta ki Entrance Exam ki ba bun kiba ki hap ban ia khun hadien ka Exam Matric.
Hadien ba la kut ka competition, ha ka por 1 baje janmiet la sdang sa ka “Career Counselling” ha ka ba ka Resource Person Prof.Natalie West Kharkongor kaba dei hi na Sohra bad Past Pupil ka St.John Bosco Girls’ Sohra, ka la pynshlur ia ki khynnah ba ki dei ban don thong ha ka jingim.I la ban jur ba dei ban jop ia ka Jingduk da ka jingtrei shitom.
Ha ka por 3 baje la sam ia ka khusnam ka ba dei ka song pisa kaba kynthup T.2000 ia kiba ioh kyrdan nyngkong,1500 ia ki ba long ba ar bad 1000 ia kiba wan ba lai, kynthup ruh ia ka syrnod sha ki nongjop.Ha ka klas X la ioh rah ia ka nam jop da U Zachary D.Diengdoh,ba ar U Paila Kitdor Myrthong bad ka kyrdan ba 3 la rah da U Batlang Phanbuh baroh ki dei na ka skul St.John Bosco Boys HSS.Ha ka klas IX Ka Phidawanbiang Khongrymmai na ka skul St.John Bosco Girls Sohra, ka la ioh ia ka nam lahduh,ia ka kyrdan ba ar la rah da U Nazariolan Synrem jong ka St.John Bosco Boys bad ia ka kyrdan ba lai la ia samlang hapdeng U Kevin Owendor Wallang jong ka St John Bosco Boys bad U Balawanbet Nongbri na ka skul Sts.Peter &Paul Mawkisyiem.Ha ka klas VIII, ia ka nam lahduh la ioh da U Frankie Umdor bad ba ar la rah da U Ferrando Shabong baroh arngut ki dei na ka skul St.John Bosco Boys,bad ia ka kyrdan ba lai la ioh da ka Christiana Sitkhain jong ka skul St.John Bosco Girls,Sohra. Ia kane ka khusnam la noh synniang da ka ing ka sem U Prof.A.K Nongkynrih na Pdeng shong Sohra ba ki la ai kyrteng kum ka A.K.Nongkynrih Award.Ki khynnah ki la ioh jingmyntoi shibun na kane ka program. U Prof.A.K Nongkynrih uba long u Chairman kane ka Centre u la ai ia ka jingkhublei ba kyrpang ia baroh ki dkhot jong ka Centre kiba kynthup ia ka Ms.E Shabong,Ms F.Kharmaw(Secretary), U Babu JQ Swett,Ms C.Swett,Bah Mel Riang,Mr.B.Majaw,Ms.B.Marbaniang,Babu A.R Sitkhain bad ia ki nonghikai ka Ms I Diengdoh na Cherra Presbyterian, ka Ms B Riahtam na Maurice Patrick King bad ka Ms B.Mawniuh na Sunny Field Laitryngew,kiba la iatrei shitom lang ban pynlong ia katei ka program ka ba jop.La ai ka jingkhublei sngewnguh ruh ia U Rev.Fr.Patrick Nongrang Principal ka skul St.John iba la long iba sbun ban ai lad barabor ia ka centre ban pynlong ia kane ka competition.
|