|
Shillong:Ka Directorate of Sainik Welfare, Meghalaya ha ka 25 tarik u Jymmang, ka la pynlong ia ka jingialang kynduh lang ki shipai ba la shongthait (Ex-Servivemen’s Rally), kaba ju pynlong man la u snem ha Assam Regimental Centre, Happy Valley, Shillong.
 Ha kane ka jingialang kynduh lang la wan ban ia don lang da ki shipai bad nongtrei ba la shongthait na ka kam, ki kurim jong ki shipai ba la khlad, ki bahaing bad kiwei kiwei na ka jylla Meghalaya baroh kawei.
U Lat ka jylla Meghalaya, u Tathagata Roy, ula wan ban ia don lang kum u kongsan, ka Honourable Justice ka Dr (Mrs) Indira Shaha kum ka symbud kongsan.
Kiwei pat pat kiba la wan ban ia donlang ki long na ka GOC HQ 101 Area, Armed Forces Tribunal, Guwahati bad ki ophisar ka tnad Defence, ki ophisar ka sorkar jylla bad na ka tnad shipai bad kiwei.
U kongsan, haba ai jingkren u la pynpaw ba u don ka jingsngewthuh ia ka jinglen lade ki shipai bad ki nongtrei ha kaba iada ia ka ri bad ka tnad Directorate of Sainik Welfare ka don ka jingthmu ban ai kam ia ki shipai bad nongtrei ba la shongthait ha kiwei pat ki kam ki ban wanrah ka jingpahara kaba shngain ha kiwei pat ki bynta.
“Kumba 60000 ngut ki shipai bad nongtrei ki shongthait man u snem bad ki dei kiba don ka jingryntih, ka jingtbit bad ki lah ban rung kam ha kino kino kiwei pat ki bynta kam jong ki sorkar jylla”, u la ong.
U Lat u la ktah ia ki mat ba kongsan kum ki lad ban ioh kam ioh jam bad kiwei kiwei ha ka Directorate. U la iathuh ba ka sorkar jylla ka la mang na ka bynta ka Zila Sainik Welfare Office Tura na ka bynta 5 tylli ki district ka ri lum Garo, ki ban peit ia ka bha ka miat jong ki shipai/ nongtrei ba la shongthait, ki kurim jong ki shipai ba la khlad noh.
U la pyntip ruh ba ka sorkar jylla ka la buh thong ban thaw ia ka Sainik Rest House ha Shillong bad la mang tyngka ha u snem 2019-20. “Ka sorkar ka pynkhreh ruh ban thaw ia ka Sainik school ha ka jylla”, u la ong.
U la theh ki jingiaroh ia ka jingshakri ki shipai bad nongtrei ba la shongthait kiba la len lade na ka bynta ka kamram kumjuh ia ki Union, ki League, ki Association jong ka jylla kiba la ai ka jing-shakri bad jingiatrei lang.
U Secretary ka Rajya Sainik Board & Director Sainik Welfare, u Col Gautam Kumar Rai (Retd), Director, Directorate of Sainik Welfare, u la ai ka jing-pynshai ha kaba ia dei bad ki grant/ loan bad kiwei kiwei pat ki jingmyntoi na ka sorkar pdeng bad sorkar jylla.
Ka Justice Dr (Mrs) Indira Shah ka la ai ka jingpyn-shai ha kaba ia dei bad ka jingtrei-kam ka Armed Forces Tribunal (AFT), Guwahati. Ka la ong ba ki shipai/ nongtrei ba la shongthait ki dei ban ioh ki jingmyntoi kum ki bai bam tymmen. Ka la ong ba ka AFT kan leh katba lah ban pyniakhun ia ki shipai/nongtrei ba la shongthait ban ioh ia ki hok jong ki.
|
Phi don ban ong eiei?