Pynlong ain kyiad Khasi : Dr Don

Shillong, 9 Jylliew:
U Nongialam liang pyrshah ha iing dorbar thawain u Dr Donkupar Roy u la iahap ia ka jingmut jong u Bah HDR Lyngdoh ba dei ban pynlong ain noh ia ki kyiad Khasi khnang ba ka pisa thied ia ki kyiad phareng kan leit sha ki kyiad Khasi bad ka sorkar kan ioh khajna ruh.
Haba shim bynta hynne ha ka jingkren ia ka mang tyngka hapoh ka iing dorbar, u Dr Roy u la ong, “Nga sngew iahap ia ka jingkren jong u myntri ka transport ba dei ban pynlong ain noh ia ki kyiad Khasi khnang ba ka sorkar kan ioh khajna bad kan nym long shuh kaba shu leh beain”.
Hynrei ha kajuh ka por, u la ong ba kam mut ba shu pynlong ain, dei ban thaw ruh ia ki kyndon ba ka rukom shet ka dei ban long kaba khuid bad ka bym ktah ia ka koit ka khiah.
U Dr Roy u la ong ba da ki klur ka pisa na kane ka jylla, ka la leit shabar namar ban thied ia ki kyiad phareng, hynrei lada ka sorkar ka lah ban thaw ain, kan ioh khajna na ki kyiad Khasi bad kan nym long shuh kaba beain.