Shillong, 21 Nailur:
Ka kompeni sam ding ka sorkar ka Meghalaya Energy Corporation Limited (MeECL) ka la leh thurmur bha ha ka rukom ban pynlip ding ha ki jaka ha sor bad katkum ka jingpynbna jongka, ka la buh ban pynlip ding ha ka por 9 baje janmiet ha ki jaka ha sor hynrei tang shu tied u sekhon tik ha ka por 8 baje janmiet, ka ding ka la lip soit.
Kane ka jingpynlip ding ka MeECL ka la pynkhiew bitar bad kiew jinging ia ki paidbah ka sorkar namar ba ka MeECL kala leh khnang ha kane ka por kaba ki paidbah ki dang donkam bha ban pyndep shibun ki kam ki jam. Wat ki khynnah khyllung ruh ki dang donkam ban ioh jingshai ha kane ka por namar ba kim pat thiah hynrei kiba bun ki paidbah, ki la pynrem jur ia ka MeECL kaba la phiel ka jingshakri ia ki paidbah.
Lada ka MeECL ka pynlip ding haduh ar ne lai kynta ha une u bnai Nailur ba dang bun ka por ba hap u slap, lashai ynda la poi ka por ha u bnai Tlang, kan jia kumno ym tip shuh.
Kane ka kompeni ka sorkar kaba la dap ram shi rynieng, ka la pynbitar shuh shuh ia ki paidbah hadien ba ka sorkar kam lah ban ai ia ka jingshakri kaba biang. Ki kam ki jam, ki jingdonkam jonng ki paidbah ki la sahkut lut tang namar ka jingtlot kane ka kompeni sorkar.
U nongthoh khubor ba la ioh iakren bad ki briew kylleng, ki la pynpaw ba jin lada don da kiwei ki kompeni ban sam ding, khlem pep ki paidbah kin kiar rai maw rai dieng ban shim ding na ka MeECL.
Phi don ban ong eiei?