Pynliem ki khynnah ka U-15 ka Academy ia ki U-19 ka East Bengal

New Delhi, 28 Jylliew:
Ka U-15 Regional Academy Kolkata kaba dei jong ka All India Football Federation ka la pynkhreh ia ka U-16 International Tournament ha kaba ka la jop ia ki khynnah U-19 jong ka East Bengal ha ka jingiakhun paralok ha madan ka East Bengal ground.
U Krishna Pandit u la thep ia ka kol ha ka 83 minit da ka penalty.
Kane ka dei ka jingjop kaba ar jong ki khynnah ka U-15 ka Regional Academy Kolkata. Ki la pynliem ia ki khynnah ka klob I-League ka Prayag United kham mynshwa.
Ha ka kyrwoh ba la pynlait da ka AIFF, la ong ba u Head Coach u Goutam Ghosh u la pynpaw ia ka jingkmen ia kane ka jingialehkai bha jong ki khynnah kane ka Academy.
“Kane ka jingjop kan ai mynsiem ia ki khynnah jong ngi. Ha ka jingshisha ngi la jop ia ka kynhun kaba khlain bha ha kine ki ar tylli ki jingialehkai ba la dep, la ong u Ghosh.