Nongstoiñ: Ka kynhun ialehkai jong ka Ryntih SC kala ioh ban jam sha sha kawei pat ka wat jong ka lympung Rani Motor’s Knock out Football Tournament (RMKOFT) hadien ba kala ioh ban khur ia ka jingjop pyrshah ia ka MLP FT ha ka jingiakhun kaba la long ha ka sngi Nyngkong jong ka taiew ha ka madan Mawkynjoin Laitkseh.
Shi bynta ka jingiakhun hapdeng ka Ryntih Sc pyrshah ia ka MLP FT ha Laitkseh:Rupang
Haba phai sha katei ka jingialehkai kaba la long ha pdeng kitei ki ar tylli ki kynhun kala long kaba itynnad haduh katta katta bad kaba la pynhun jrut ia ki paidbah nongwan peitkai khamtam ia ki nongkyrshan ka Ryntih SC namar ka jinglah jong ka kynhun ban pynwan dur ia ka jingialehkai bad khamtam ban lait na ka jingshah rem hapoh ki 90 minit.
Shuh shuh ki paidbah kila sakhi ruh ia ka jinglah jong ka MLP ban ialehkai bha naduh kaba sdang jong ka kylla step ha kaba kala ioh ruh ia kawei ka kabu ksiar ban thep kol bad khlem da pynsep ei iakatei ka kabu u Ambrose Syngkli u la ioh ban sangah da ka khlieh iaka bol ba la pashat da u Bisharlang Kharumnuid kaba la rung beit jlang shapoh ka kol bad katei kala jia long ruh ha ka minit kaba 20.
Hadien katei ka jingshah thep kol bad shah lam khmat noh da 1 kol na ka liang jong ki rangialehkai ka Ryntih ruh kila ialehkai tyngeh ban ioh pynphai noh ia katei ka 1 kol bad da ka jingiakhun kaba tyngeh kila ioh ruh ia ar tylli ki kabu ksiar ban pynphai noh ia katei ka 1 kol bad kitei ki kabu kila pynskuiñ bha ia ki paidbah namar ka bol kala khreh sa tang ban shu rung noh pynban ka bok kam shymla don ryngkat bad ka Ryntih ha kaba ia katei ka bol la lah ban kynjat noh da ki rangapdien ka MLP shabar ka jingma.
Ym tang kata ha ka jingiakhun kaba la bteng biang sa ha ka kylla miet ruh na ka liang jong ki rang ialehkai ka Ryntih kila iakhun dohiap ban ioh bat bha ia ka bol hynrei kim shymla lah pat ban thep kol namar ka jingtbit jong ki rangap dien ka MLP, hynrei kaba la pynitynnad shuh shuh ia ki paidbah ka long ba u rangap kol ka Ryntih u la ialeh beit ban kynjat ia ka bol sha jan ka kol jong ka MLP kaba la buh jingma ruh ia ka MLP man ba poi bol.
Watla sa tang khyndiat minit eh ba ka jingiakhun kan kut noh ki rang ialehkai ka Ryntig kim shymla duh mynsiem hynrei kila ialeh beit ban ioh pynphai ia ka 1 kol ba kila shah thep bad ban pyniakhaid ruh ia ka jingialehkai bad ha kitei ki khyndiat minit kata ha ka minit kaba 87 u rangap kol ka Ryntih u la leh beit kumba ju leh kata ban kynjat ia ka bol wut wut shajan ka kol jong ka MLP bad dei ha katei ka minit ka bok kala wan ryngkat bad ka Ryntih ha kaba u Nangshanlang Dkhar u la ioh ban bat ia bha ia ka bol bad u la pashat ruh sah u Arvist Kharkongor u bala lah syndon ban khyrwit ia ka kol kaba long ka kol kaba la pyniakahid ia katei ka jingialehkai.
Kumta hadien katei ka jingiakhaid na ka liang jong ki nongpyniaid kila rai ban phah ia shut noh da ka tie breaker bad ha katei ka jingiashut ka Ryntih SC kala lah ban pynliem noh ia ka MLP da 5 kol la 4 kol bad ha katei ka sngi ia ka nam Man of the Match la ioh ban khur da u Maitshaphrang Kharumnuid u ba dei ruh u rangap kol ka Ryntih SC.