Shillong:Ka jingialeh kaba 31 jong ka OC Blue Shillong Premiere League 2021-22 ba lah ialeh hynnin ka sngi ha Third Ground, Polo, ka Ryntih ka la pynliem ia ka Mawkhar da 2-0 da ka jingioh thep jong u Dawanplielad Myrchiang ha ka minit kaba 29 bad u Mebankhraw Wahlang ha ka minit kaba 80.
Ha ka jingia kynduh kaba lah dep hap deng kine ki ar kynhun, ka Ryntih ka la ioh jop da 3-1 ha ka jingialeh kaba ha ka 30 tarik u Jylliew.
Ka Ryntih ka la ioh ban mih madan biang hynnin ka sngi da ka jingioh ban khur 11 poin ha ki jingialeh kiba lah dep katba ka Mawkhar kaba ieng shapoh duh ka dang ioh tang 2 poin. Da ka jingioh jop jong ka pyr shah ia ka Mawkhar, ka Ryntih mynta ka la kamai 14 poin da kaba knieh noh ia ka jaka jong ka Rang dajied United bad mynta ka ia ieng ryngkat lang bad ka Langsning FC ha ka kyrdan kaba lai haba iakhein na ka jingioh poin, hynrei ka long kham hadien pat na ka jingiapher ha ka jingioh kol, kata, +6 la +4.
Haba phai sha ka Mawkhar, ka ju ioh shibun tylli ki lad ban pynkhih jar hynrei ka duna noh ha ka rukom thew ban pynrung ia ka bol shapoh ka jar, bad kiba kum kine ki lad ki dei kiba u Justerwell Tham u ju ioh, bad kum kine ka dei ha ka minit kaba 17 ha kaba u la thmu ban kynjat ia ka bol sha pyrshah ka dak hynrei ka la lait noh sharud.
Nalor kane, ka jingbakla jong u nongiada ka Mawkhar u Ban shan skhem Kharsyntiew uba la mut ban ai bol da kaba pyntyngkhuh khlieh sha la u nongapkol hynrei kane ka la pynioh kornar ia ka liang pyrshah ha kaba u Myrchiang ula ioh ban shim ia ka lad ban thep ia ka kol kaba nyngkong sha ka Ryntih. Hadien kane, ka jingialehkai ka la long khluit ha kaba sdang jong ka kylla miet, haba ka Mawkhar ka la kyrpad ia ka penalty kaba mih na ka jingbakla ha ka bok, hynrei ka la duh noh da ka jingkyrngah jong u refri, kumta ka la mih khyndiat ka jingklumar kaba la lam sha ka jingioh red card jong u Garnoldstar Marbaniang lem bad arngut kiwei pat kiba la ioh yellow card.
Mynta ka sngi ka Malki SC kaba dang kamai 4 poin kan iakhun pyrshah ia ka Langsning FC kaba lah ioh 14 poin. Kum ban pynkynmaw ba ha ka jingialeh jong ka first leg ka Langsning ka la pyn rem ia ka Malki da 4-0.
Phi don ban ong eiei?