Shillong:Ka kynhun ialehkai ka Meghalaya ka la long ka kynhun ba nyngkong eh ka ban ioh rung sha ka Final jong ka U-16 Boys’ Vijay Merchant Trophy, hadien ba ka la lah ban pynrem noh ia ka Naga land da 72 ron ha ka jing ialehkai kaba la long ha ka sngi Palei ha Bhubaneswar.
Ka Meghalaya kan hap ban iakhun pyrshah ia ka jylla Manipur ne ka Mizoram ha ka Final ban ia knieh ban rah ia ka nam lahduh.
U Apandanka Ma rak, u la lah biang ban ialehkai bha ha kaba u la khur biang ia ka 5 wiket bad ai 45 run na ki 11 over bad ka Nagaland ka la hap lut ki nongtied da kaba kamai tang 92 ron ha ka pali tied ha ka sien kaba ar.
U Apandanka ha ka jing kawang bol ha ka bynta kaba nyngkong ba ka Nagaland kala tied, u la ioh ban khur 6 tylli ki wiket bad ai tang 40 run bad haba khein kyllum ia ka jingioh khur wiket u Apandanka ka long 11 wiket bad ai tang 85 ron.
Kum ban shu pynkynmaw, ha ka sngi Balang ka Meghalaya ka la tied nyngkong bad ka la kamai 123 ron, katba ka Nagaland ka la kamai tang 83 ron bad haba ka Meghalaya kala leit tied biang ka la kamai 22 bad ym shim la don satia kiba out.
Ha ka sngi Palei, u Aashish Kumar Lohar, ula kamai 57 ron na ka bynta ka Meghalaya kaba la kamai 124 ron bad hap lut ki nongtied bad ka Meghalaya ka la tam da 165 run ia ka Nagaland.
Haba ka Nagaland ka la leit ban tied ha ka bynta ka baar kala kamai 92 run bad hap lut baroh ki nongtied, hynrei ha kaba sdang ka Nagaland ka la ialehkai bha bad kamai 86 ron bad hap tang 3 wiket hynrei hadien kane ka jingiakhun ka la kylla kynsan ha kaba 7 ngut ki nongtied ki la hap kynsan bad kamai tang 6 run haka 5 over.
Ar ngut ki nongtied ka Nagaland ki la khyllem lyngba ka Run Out katba u Thakuria bad u Paisal Ali kila shim mar 1 wiket.
Ka Meghalaya mynta ka dang ap ban ia khun pyrshah ia ka Mani pur ne Mizoram ha ka Final.
Ka Meghalaya kala dep ban pynrem teng ia ka Mizoram, katba ka Mani pur ka la dep ban pynrem teng ia ka Meghalaya.
Phi don ban ong eiei?