Nongstoiñ: Ka kynhun ialehkai jong ka Shillong Lajong FC mynta u snem kala hap ban leit phai ïing noh dang kloi na ka lympung Rani Motor’s Knock out Football Tournamement (RMKOFT) bala pyniaid da ka Laitkseh Sport Club (LSC) hadien ba kala shah pynliem noh ha ka jingiakhun kaba nyngkong eh ka jong kata ha ka wat kaba nyngkong kaba la long ha ka sngi Saitjain jong ka taiew bala lah ha ka madan Mawkynjoin Laitkseh.
U rangapkol ka Marbisu u bala pyrshang ban khynrup ia ka bol kaba la rung shapoh ka kol.
Ka kynhun ialehkai jong ka Shillong Lajong FC kaba dei ruh ka lahduh jong katei ka lympung ha u snem bala lah bad kaba dei ruh ka kynhun kaba don ha ka Super Division jong ka Shillong Premiere kala shah pynliem noh na ka lympung RMKOFT 2018 ha ka kynhun ialehkai jong ka Marbisu FC ka kynhun ialehkai kaba don ha ka kyrdan 1st Division jong ka Shillong League da 2 kol la 1 kol.
Haba phai sha katei ka jingiakhun jong kitei ki ar tylli ki kynhun kala long shisha ka jingialehkai kaba itynnad haduh katta katta bad kaba la pynhun hi jrut ia baroh ki paidbah namar ka jinglah jong ki rang ialehkai ka Marbisu ba iakhun tyngeh bad ban ialehkai khambha ban ia ki rang ialehkai ka Shillong Lajong kaba la pynlong ruh ia ka Marbisu ban lam khmat da 1 kol ha ka minit kaba 19 jong ka kylla step lyngba u Banpynsngain Nongsteng.
Shuh shuh haba wan phai biang sha ka jingiakhun jong ka kylla miet ka jingiakhun kala nang kham i hun bad itynnad shuh shuh namar la sakhi ba ki rangialehkai ka Shillong Lajong kila durut tyngeh ban ioh pynphai noh ia katei ka 1 kol hynrei kim shymla ioh lad satia namar ka jingtbit ki rang apdien ka Marbisu bad na ka liang jong ka Marbisu ruh kala iakhun tyngeh ban ioh pynkhih jar biang ha kaba kala ioh ruh ia ki katto katne tylli ki kabu hynrei bun ba kila shu sepei noh na ka jingbym lah ban pynrung bha ia ki bol sha jan ka kol.
Katba ka jingiakhun ka dang khluit bha u rang ialehkai khmat ka Shillong Lajong u Parvaj Bhujia ha ka minit kaba 64 u la ioh ia ban rah shakhmat ia ka bol kaba lah ruh ban long ka kabu ksiar ia u ban ioh thep kol hynrei u rang ialehkai ka Marbisu u Banpynsngain Nongsteng u la patan bad pynur noh ia u tei u rang ialehkai ka Lajong kaba la pynlong ruh ia u nongpyniaid ban sei syndon da ka red card ia u Banpynsngain bad ai free kick ia ka Lajong bad khlem da pynsep ei ia katei ka kabu u Allan Nongbri u bala shut ia ka bol bad kala rung beit jlang shapoh ka kol.
Hadien katei ka jingshah dei red card bad ka jingshah pyniakhaid ka Marbisu Kam shymla rit mynsiem hynre kala iakhun tyngeh watla ki don sa tang 10 ngut ha madan bad ka jingiakhun ha kitei ki khyndiat minit shwa ban kut ka jingialehkai kala nang kham itynnad shuh shuh namar ba baroh ar kynhun kila pyrshang ban ia wad sa ia u nam tam bad la sakhi ruh ha ka minit kaba 83 u Parvaj Bhujia ka Shillong Lajong u la ioh ban khalah da kaba tyngeh ia ka bol hynrei sniew bok ba kala leit ban tyngkhuh noh ia u nar jong ka kol bad ka bol kala lait noh sharud.
Ka Marbisu ruh kala ioh biang ia ka kabu ban pynkhih jar sa ha ka minit kaba 88 bad khlem da pynsep ei ia katei ka kabu u Gasper Langstieh u la khyrwit ia ka bol bad kala rung jlang shapoh ka kol bad lyngba katei ka kol bala thep da u Gasper Langstieh kala pyntikna syndon ia ka kynhun ban ioh rah ia ka jingjop bad ruh ban jam pat sa sha ka wat kaba ar jong katei ka lympung ha Laitkseh.
Ha katei ka sngi ia ka nam rangialehkai ba kynsai tam la ioh ban khur da u Orestar Sad jong ka Marbisu FC u ba dei ruh u wei na ki rangialehkai u ba dang khynnah tam bad na ka liang jong ka LSC kala pyntip ba ka jingialehkai ka ban bud kan long sa ha ka 13 tarik hapdeng ka Kith United FC pyrshah ia ka Thongni FC.