Shillong: Hadien ba la iakynduh jingeh ha ki jingialehkai kiba shakhmat, ka Malki ka la ioh mynsiem mynta hadien ba ka la lah ban pynliem syndet ia ka MLP FT ha ka jingiakhun ka lympung Shillong Premier League 2018.Ka Malki ka la pynliem ia ka Meghalaya Police da 2-0 ha ka jingiakhun ha ka sngi Saitjain ha JN Stadium, Shillong.
Ka jingjop ka la pynlong ia ka Malki bad ka MLP ban iakhaid mar 7 point hynrei ka Malki ka kham don jingkyrmen.
Ha ka jingialehkai,ia ka Malki la ioh ban thep nyngkong da u Primrose Lawat haka 12 minit bad sa pynbud sa u Alem Khongwir ha ka 61 minit.
Ia ka kol ba nyngkong la ioh thep lyngba ka jingpynai bol da u Bowari Khongstia na kaphang ka diang ha kaba u Lawat u la ioh khyrwit beit jlang ha ka kol.
Ha ka kyllamiet pat, u Alem ula ioh ban khyrwit lyngba ka jingpynai u Ronnie Nongbri ia ka bol, uba kynjat beit jlang da ka kjat mon haduh ba u nongap kol ka MLP, um lah leh eiei ban kyrda.
Kane ka dei ka sien ba nyngkong ba ka Malki ka la ioh ia ka jingjop kaba kmen ha kane ka lympung SPL 2018 bad kan ai mynsiem shuh ia ka ha ki jingialehkai ban sa wan. Ka Malki mynta kan pynkhreh ban iakhun ia ka Shillong Lajong.
Ha ka jingialehkai Second Division, ka Nongumlong ka la shah pylliem da 0 – 2 ha ka Laitumkhrah.
Ha ka Third Division, ka Mawnianglah ka la pynbam da ka 5 – 0 ia ka Lumpyngngad, ka Pohkseh ka iakhaid bad ka Umphyrnai 0-0 bad ka Umphrup ka la pylliem ia ka Young XI da 1-0 kol.