|
Shillong: Ka Langsning FC ka la ioh ia ka jingjop ha ka sngi sdang jong ka jingialehkai ka lympung Second Division ka League hadien ba ka la pylliem ia ka Chennaiyin FC da 2-1 kol ha ka jingiakhun kaba long mynta ka sngi ha madan JN Stadium, Shillong. U nongialehkai bar ri ka Langsning na ri Ivory Coast u Lancine Toure u la ioh ban thep ia ka kol ba nyngkong ha ka 25 minit ka kylla step hynrei ka Chennaiyin lyngba u Prosenjit Chakroborty kala lah ban pyniakhaid ha ka 61 minit jong ka kyllamiet.
Hynrei u nam tam ka Langsning u la wan jia ha ka 83 minit lyngba u nongialehkai jongka, u Kitboklang Pale. U Kitboklang Pale bad u Ebormi Buam ki dei ar ngut ki nongialehkai na kane ka jylla ba ka Langsning ka la sei ha ka kynhun ba nyngkong jong ki 11 ngut. U nongapdien ka Langsning u Toure, uba la jrong phut, u la long ka kabu hajrong bad uba la ioh ruh ban thep da ka khlieh ha kane ka jingialehkai. Ha kane ka jingialehkai sdang, ki don kumba 2,700 ngut ki paidbah nongpeitkai ha madan. Ha kane ka jingialehkai, u coach ka Langsning u Bah Hering Shangpliang u la bujli da u Stephanson Pale bad u Ronaldkydon Lyngdoh Nonglait ha jaka u Kynsaibor Lhuid bad u Kento Sakurai. Da kane ka jingjop, ka Langsning ka la kamai 3 point bad kan iakhun sa ia ka Bengaluru FC ha ka 19 tarik ha kajuh ka jaka ha JN Stadium, Shillong. |
